शीर्ष नेतातय् प्रतिबद्धता
स्वंगू प्रमुख राजनीतिक दलया नेतातय्सं थःपिं शान्ति प्रकृया व ईलय् हे संविधान निर्माण यायेगु ज्याय् प्रतिबद्ध दुगु खँ धाःगु दु ।
नेपाल एफएमया खुक्व:गु वार्षिकोत्सव ज्याझ्वलय् बिहीवाः एनेकपा (माओवादी)या अध्यक्ष पुष्पकमल दाहाल 'प्रचण्ड', नेकपा (एमाले)या अध्यक्ष झलनाथ खनाल व नेपाली कांग्रेसया कार्यवहाक सभापति सुशील कोइरालां दलत दथुइ दुगु अविश्वासया वातावरण चीकाः विश्वासया वातावरण निर्माण यायेत थःपिं लगेजुयाच्वंगु खँ धाःगु खः । उकीया निंतिं याकनं हे उच्च राजनीतिक संयन्त्र गठन जुइगु नं नेतातय्सं विश्वास प्वंकादिल ।
ज्याझ्वलय् माओवादी अध्यक्ष प्रचण्डं माओवादीं शान्ति प्रकृयाया विकल्प मखंगु धयादिसें माओवादीं यायेत्यंगु स्वायत्त राज्य घोषणा संविधानया मर्म विपरित मजुगू धयादिल । वयेकलं संघीयताय् वने चाहे मजुपिंसं थुकीया विरोध यानाच्वंगु धयादिसें संघीयता बारे संवैधानिक व्यवस्था हे जुइधुंकूगुलिं जनतायात थप ध्वाथुइकेगु निंतिं माओवादीं थ्व घोषणा यायेत्यंगु धयादिल । अथेहे वयेकलं स्वायत्त गणराज्य घोषणा सांकेतिक जक जुइगु व समान्तर सरकार गठन मयायेगु खँ स्पष्ट यानादिल ।
ज्याझ्वलय् एमाले अध्यक्ष खनालं न्हूगु संविधान निर्माण लिपाः जक नागरिक सर्वोच्चता कायम जुइगु जुइगुलिं माओवादीयात आन्दोलन त्वताः सहमतिलय् वयेत इनाप यानादिल । वयेकलं आःया ई प्रतिस्प्रधा यायेगु ई मखसें सहमति यानाः न्ह्याः वनेगु खः धयादिल ।
अथेहे कांग्रेस कार्यवहाक सभापति कोइरालां माओवादीं ल्वाभःया राजनीतिक त्वताः पुलांगु सहमति पालना मयातल्ले सहमतिया आधार तयार जुइमफइगु दाबी यानादिल ।
अथेहे नागरिक समाजया न्ह्यलुवाःत पद्मरत्न तुलाधर, दमननाथ ढुङ्गाना, डा. देवेन्द्रराज पाण्डे, कृष्ण पहाडी लगायतं दलत दथुइ ब्वलनाच्वंगु द्वन्द्वया वातावरण अन्त्य यानाः संविधान निर्माण ईलय् हे यायेमाःगु खँ बः ब्यूगु खः ।
