माओवादी पाखें संघीयता कमजोर यायेगु षड्यन्त्र : प्रम
प्रधानमन्त्री माधवकुमार नेपालं माओवादीं संविधान विपरीत गणराज्य घोषणा यानाः संघीयतायात कमजोर दयेकेगु षड्यन्त्र यायेत्यंगु खँ धायादिगु दु ।
बिहीवाः इलामय् किरात धर्मगुरु आन्मानन्द लिंदेनया न्यय्खुक्वःगु बुदिँया ज्याझ्वः उल्लेज्या यानदिसें माओवादीं घोषणा यायेत्यंगु गणराज्य सुयातं स्वीकार्य मजुइगु धयादिसें गणराज्य संविधानसभां याइगु खः, माओवादीं मखु धयादिल ।
माओवादीं यायेत्यंगु गणराज्य घोषणां संविधानसभाया अवमूल्यन जुइगु धयादिसें प्रधानमन्त्री नेपालं माओवादीं देय्यात कमजोर यायेत स्वयाच्वंगु द्वपं बियादिल । संघीयता धइगु देय्यात भागवण्डा यायेगु मखु धयादिसें वयेकलं माओवादीयात गैरजिम्मेवार ज्या मयायेत इनाप यानादिल । वयेकलं माओवादीं थः अनुकूल गणराज्य घोषणा यानाः राष्ट्रिय एकता कमजोर यायेत स्वःगु द्वपं नं बियादिल ।
अथेहे ज्याझ्वलय् सभामुख सुवास नेम्वाङं निर्धारित ईलय् हे संविधान निर्माण यायेत राष्ट्रिय सहमति कायम यायेमाःगु धयादिल । निर्धारित ईलय् हे संविधान च्वइगुलि आशंका मयायेत इनाप यानादिसें वयेकलं दलतय्त छप्पँ जुयाः न्ह्याः वनेत जनदबाव आवश्यक जूगु धयादिल ।
