गणराज्य घोषणा अन्तरिम संविधान व शान्ति सम्झौता विपरित : प्रम
संविधानसभा व अन्तरिम संविधानया मर्म विपरित मदु : माओवादी
प्रधानमन्त्री माधवकुमार नेपालं एनेकपा (माओवादीं) घोषणा यायेत्यं स्वायत्त गणराज्यं थः अच्चम्म जूगु धयादिसें थ्व अन्तरिम संविधान व शान्ति सम्झौता विपरित जूगु टिप्पणी यानादीगु दु ।
खुक्वःगु ज्यापु दिवसया लसताय् बुधवाः येँया बसन्तपुली जूगु समारोहलय् न्ववानादिसें वयेकलं नेपाःया राज्य पुनःसंरचना बारे दलत दथुइ सहलह जुयाच्वंगु ईलय् गणराज्य घोषणा यायेगु ज्या आपत्तिजनक जूगु धयादिल । वयेकलं राज्य पुनःसंरचना यायेत हे संविधानसभां ज्या यानाच्वंगु ईलय् थःथम्ह हे गणराज्य घोषणा यानाः संविधानसभाया औचित्य समाप्त यायेमज्यूगु बिचाः प्वंकादिल ।
वयेकलं संघीयतां देय्यात बल्लाकीगु जुसां थुकीया बारे थीथी दल व सम्बन्धित पक्ष नाप सहलह मयायेकं घोषणा याःसा राष्ट्रिय अखण्डता हे खलबल जुइफइगु धयादिल ।
उखे माओवादीं धाःसाः गणराज्य घोषण यायेगु ज्याझ्वः संविधानसभाया मर्म व अन्तरिम संविधानया भावना विपरीत मजूगु ठहर याःगु दु ।
बुधवाः च्वंगु माओवादीया स्थायी समिति दुजःतय् बैठक लिपाः प्रवक्ता दीनानाथ शर्मां गणराज्य घोषणा जनयुद्ध व जनआन्दोलनया भावना कथं जूगु दाबी यानादिल । वयेकलं सरकार व दलत संघीयताय् मवनेगु खंकाः हे थःगु पार्टीं गणराज्य घोषणा यायेत्यंगु कनादिल । वयेकलं गणराज्य सांकेतिक व राजनीतिक रुपय् जक जुइत्यंगु खँ न्ह्यथंनादिसें थुकीं विस्तृत शान्ति सम्झौताया उल्लंघन मयाइगु दाबी यानादिल ।
