राष्ट्रया परिभाषाय् नं दलत दथुइ विवाद
न्हूगु संविधानय् राष्ट्रया परिभाषा गज्याःगु जुइ धकाः सभासद्त दथुइ मतभिन्नता खँगू दु । संवैधानिक समितिलय् शुरु जूगु राष्ट्रया परिभाषा विषयक सहलहलय् थीथी राजनीतिक दलतय् सभासदतय्सं फरक फरक सुझाव न्ह्यब्वःगु दु । राष्ट्रया परिभाषाय् सभासद्त दथुइ विवाद उत्पन्न जुइवं बुधवाः च्वंगु समितिया बैठक बिना निष्कर्ष क्वचाःगु खः ।
संवैधानिक समिति अन्तर्गत उपसमितिं नेपाः स्वतन्त्र, अविभाज्य, सार्वभौमसत्ता सम्पन्न, धर्म निरपेक्ष, समावेशी, संघीय लोकतान्त्रिक गणतान्त्रिक राज्य जुइगु खँ न्ह्यथंसें मस्यौदा समितिलय् पेश याःगु खः । उपसमितिं पेश याःगु मस्यौदाय् मुल समितिलय् बुधवाः निसें सहलह शुरु जूगु खः । बैठकय् समितिया दुजःतय्सं उन्मुख समाजवाद, स्वशासित, बहुराष्ट्रिय, समावेशी प्रतिनिधि, संघीय प्रणाली व बहुजातीय लगायतयात खँग्वःया परिभाषा न्ह्यथंनेमाःगु बिचाः प्वंकूगु दु ।
अथेहे सभासद्तय्सं नेपालय् यक्वः धर्म जूगुलिं हरेक धर्मया सम्मानया कथं आःया संविधानय् नेपाः राष्ट्र धर्म निरपेक्ष हे जुइमाःगु खँय् बः ब्यूगु दु । बैठकय् राष्ट्रिय प्रजातन्त्र पार्टीया नेता लोकेन्द्र बहादुर चन्दं धाःसाः संविधानय् धर्म सापेक्ष राष्ट्र जुइमाःगु खँ न्ह्यथंसें फरक मत तयाः थुकीया निंतिं जनमत संग्रहलय् वनेमाःगु सुझाव ब्यूगु दु ।
बैठकय् दुजःतय् खँ पायेवं विवादित विषययात निर्वाचन मार्फत सहमति यायेगु निर्णय समितिं याःगु दु ।
