लडाकू सेनाय् समायोजन यासाः गृहयुद्ध : कोइराला
नेपाली कांग्रेसया कार्यवहाक सभापति सुशील कोइरालां माओवादी लडाकूयात सेनाय् समायोजन याःसा देय् गृहयुद्ध ब्वलनीगु दाबी यानादीगु दु । वयेकलं माओवादी अराजकताया मू कारण लडाकूत जूगु धयादिसें शिविरय् दुपिं लडाकूयात व्यवसायिक सेनाय् समायोजन याये मज्यूगु तर्क पेश यानादिल । वयेकलं माओवादी लडाकूयात सेनाय् समायोजन मयासें सीमा सुरक्षा, वन सुरक्षा, औद्योगिक सुरक्षा थंज्याःगु क्षेत्रय् लगे यायेमाःगु बिचाः प्वंकादिल ।
बुधवाः येँय् जूगु छगू ज्याझ्वलय् न्ववानादिसें वयेकलं देय् द्वन्द्व ब्वलंकेत माओवादीं गणराज्य घोषणा यायेगु निर्णय याःगु द्वपं बियादिसें यदि माओवादी शान्ति प्रकृयायात निष्कर्षय् थ्यंकेत तयार जुसाः गणराज्य घोषणा यायेगु ज्याझ्वः तत्काल लितकायेमाः धयादिल ।
रिपोटर्स क्लबं या:गु ज्याझ्वलय् कोइरालां माओवादीं वैधानीक विधि पाखें सत्ता कब्जा यायेमफेवं लुटपाट, जवरजस्ती, सम्पत्ति कब्जा यायेगु थंज्याःगु पुलांगु ज्या हानं न्ह्याकूगु धयादिल । वयेकलं देया थीथी क्षेत्रय् माओवादी यानाच्वंगु अराजक गतिविधिया कारणं राजनीतिक मुठभेडया अवस्था सृजना याःगु धयादिल ।
