'संविधानसभा विघटन यायेगु षड्यन्त्र'
एनेकपा (माओवादी)या उपाध्यक्ष डा. बाबुराम भट्टराईं कांग्रेस व एमालेया नेतातय्सं संविधानसभा विघटन यायेगु षड्यन्त्र यानाच्वंगु द्वपं बियादीगु दु ।
बुधवाः वाइसीएल नेपालं नेपाःया बेरोजगारी समस्या व युवा स्वरोजगार विषयक बिचाः गोष्ठीइ वयेकलं एमाले व कांग्रेसया छुं नेतातय्सं लिप्पांगु ईलय् प्वंकूगु अभिव्यक्तिं शान्ति सम्झौता भंग यानाः संविधानसभा विघटन याये चाहे जूगु स्पष्ट जूगु धयादिल । वयेकलं माओवादीं थज्याःगु षड्यन्त्रयात कदापि सफल जुइमबीगु दाबी यानादिल ।
वयेकलं वर्तमान कतामरी सरकार सत्ताय् वयेवं भ्रष्टाचार अप्वःगु धयादिसें सरकारं भ्रष्टचार अप्वयेकेगु बाहेक मेगू छुं ज्या याये मफुगु द्वपं बियादिल । वयेकलं पुलांगु मानसिकता दुगु राजनीतिक दलतय्सं देय्यात प्रतिगमन पाखे यंकाच्वंगु द्वपं नं बियादिल ।
अथेहे ज्याझ्वलय् नेता भट्टराईं सुगौलि सन्धि लिपाः नेपालय् बेरोजगारया समस्या अप्वःगु धयादिल । वयेकलं माओवादी नेतृत्व सरकारं हःगु युवाः रोजगार योजनायात वर्तमान सरकारं बेवास्ता यानाः युवातय् भविष्यय् खेलवाद याःगु धयादिल ।
