गणराज्य घोषणा मयायेत सभामुखया इनाप
सभामुख सुवास नेन्वाङं एनेकपा (माओवादी)यात गणराज्य घोषणा यायेगु ज्याझ्वः दिकेत इनाप यानादीगु दु । वयेकलं संविधानसभा पाखें क्वःछिगु एजेण्डायात न्ह्यने सारे यानाः माओवादीं द्वंकूगु खँ धयादिल ।
वयेकलं माओवादीं गणराज्य घोषणा मयाइगु व प्रचारात्मक ज्याझ्वः जक याइगु खँ माओवादी नेतातयसं जानकारी ब्यूगु धयादिसें माओवादीं गणराज्य घोषणा याइगु ज्याझ्वः रद्द याइगु विश्वास प्वंकादिल ।
उधौली नखःया लसताय् बुधवाः विराटनगर थ्यंकादिम्ह सभामुख नेम्वाङं पत्रकारत नाप खँल्हाबंला यानादिसें वयेकलं संविधानसभां संविधान च्वयेगु ज्या यानाच्वंगुलिं ईलय् हे संविधान निर्माण मजुइलाः धकाः शंका मयायेत इनाप यानादिल । वयेकलं संविधानसभा नाप स्वपू दुगु विषय व एजेण्डा संविधानसभां हे क्वःछिगु नं धयादिल ।
अथेहे मेगू छगू प्रशंगय् वयेकलं न्हूगु संविधानय् जनजातितय् हक अधिकार सुनिश्चित यायेत दलत गम्भीर जुइमाःगु बिचा: प्वंकादिल ।
