'माओवादीं ज्याझ्वः लित काइ'
येँ (सन्ध्या टाइम्स)/संविधानसभाया क्षेत्राधिकारय् माओवादीं हस्तक्षेप याःगु द्वपं सभामुख सुवास नेम्वाङं बियादीगु दु। माओवादी थ्वहे वइगु मंसिर २६ गतेनिसें थीथी गणराज्यया घोषणा यायेगु धकाः याःगु निर्णययात कयाः विराटनगरय् पत्रकारतय्त प्रतिक्रिया बिसें वय्कलं उगु खँ धयादीगु खः ।
वय्कलं गणराज्य घोषणा यायेगु माओवादीया ज्याझ्वः दिकेत इनाप नं यानादीगु दु ।
पत्रकारतलिसे खँ ल्हायेगु झ्वलय् वय्कलं संविधानसभां क्वःछीगु एजेन्डायात न्ह्यःने हयाः माओवादीं गल्ती यानाच्वंगु द्वपं नं बियादीगु दु ।
पत्रकारतलिसे खँ ल्हायेगु झ्वलय् वय्कलं माओवादीं थःपिनि गणराज्य घोषणा ज्याझ्वःयात लित काइगु विश्वास नं प्वंकादीगु दु ।
'माओवादी नेतातय्सं गणराज्य घोषणा ज्याझ्वः प्रचारात्मक जक खः धकाः जितः धाःगु दु' नेम्वाङ धयादिल, 'जितः विश्वास दु, वय्कःपिंसं गणराज्य घोषणा ज्याझ्वः लित कयादी ।'
संविधानसभाया ज्या न्ह्यानाच्वंगुलिं इलय् हे संविधान दयेकेगु ज्याय् शंका मयायेत इनाप यानादिसें मंसिरया दुने स्वंगू समितिं मस्यौदा लःल्हायेत्यंगु जानकारी नं वय्कलं बियादिल ।
