थौं खुक्वःगु ज्यापु दिवस तःजिक हन
येँ (सन्ध्या टाइम्स)/ ज्यापुतय्सं थौं योमरि पुन्हिया लसताय् खुक्वःगु ज्यापु दिवस तःजिक हंगु दु ।
ज्यापुतय्सं दँय्दसं येँय् सांस्कृतिक जुलुस पिकयाः ज्यापु दिवस हना वयाच्वंगु खःसा सरकारं धाःसा थगुनेनिसें ज्यापु दिवस धकाः मान्यता बियाः सार्वजनिक रुपं बिदा तकं बिउगु खः ।
थौं ज्यापु संस्कृति विकास कोषया ग्वसालय् येँया खुइप्यंगू ज्यापु त्वाः मध्ये न्यत त्वाःया संयोजनय् खुक्वःगु ज्यापु दिवस हंगु खः ।
ज्यापु दिवसया लसताय् येँया परम्परागत ज्यापु त्वाः नापं स्वनिगःया गां गामय् च्वंपिं ज्यापु जातिं नं थःथःगु सांस्कृतिक बाजं सहित थौंया जुलुसय् ब्वति काःगु खः। सांस्कृतिक जुलुस येँ देय् चाःहिलाः वसन्तपुली थ्यंकाः छगू तःजिगु समारोह यानाः क्वचायेकेगु ग्वसाः दयेकातःगु दु। बसन्तपुली जुइगु थौंया उगु सभाय् प्रधानमन्त्री माधव कुमार नेपालयात मू पाहां कथं ब्वनातःगु दु ।
