नेप्से वंगु स्वदँ न्ह्यःया स्थितिइ
येँ (सन्ध्या टाइम्स)/नेपाल स्टक एक्सचेन्जया शेयर कारोबारं नेप्से परिसुचक कुहां क्रमं म्हिगः नं जारी हे जुल। सदां थें म्हिगः नं बजाः चालेवं कुहां वयेगु शुरु जूगु नेप्से कारोबारया लगभग अन्तपाखे धाःसा तसकं हे सामान्य अंकं थहां वन। तर नं म्हिगःया कारोबारय् नं नेप्से कुहां वयेवं वंगु स्वदँया दुने हे दकलय् म्हो विन्दुइ थ्यंगु दु ।
वंगु झण्डै प्यला न्ह्यः निसें दथुइ छुं ई त्वःता नेप्से लगातार कुहां वयाच्वंगु दु। स्टक एक्सचेन्जय् म्हिगःया शेयर कारोबारय् नेप्से परिसुचक ७ दशमलव १२ अंकं कुहां वनाः ५२१ दशमलव ७७ अंकय् थ्यंगु दु। सेन्सेटिभ इन्डेक्स २ दशमलव ४७ अंकं कुहां वःगु दुसा फ्लोट इन्डेक्स नं शुन्य दशमलव ८७ अंकं कुहां वल ।
उखे कारोबार जूगु अप्वः थें वाणिज्य समुहया शेयर कारोबारय् म्हिगः नं भाः कुहां वःगु दु। नेप्सेय् दकलय् अप्वः प्रभाव लाकीगु वाणिज्य बैंक मध्ये एभरेष्ट बैंकया शेयरय् ४७/-, स्टायण्डर्ड चार्टर्ड बैंकया शेयरय् ४१/-, सिदार्थ बैंकया शेयरय् ३७/- तकाया लिसें मेमेगु नं आपालं वाणिज्य समुहया शेयरय् भाः कुहां वयेवं थुगु समुहया उपसुचक ६ दशमलव २७ अंकं कुहां वनाः ४९५ दशमलव ९२ अंकय् थ्यं वःगु दु ।
नेपाल स्टक एक्सचेन्जय् जूगु न्यय्गुंगू कम्पनीया शेयर कारोबारय् वाणिज्य बैंक लगायत आपालं कम्पनीया शेयर भाः कुहां वंगु दु। वाणिज्य समुहपाखे एनआईसी बैंकया १५०/-, स्टायण्डर्ड चार्टर्डया १००/- या लिसें हिमालयन, नविल, सिटिजन्स इन्टरनेशनल, बीओकेया भाः गाक्कं कुहां वनेवं वाणिज्य समुहया सुचक दकलय् अप्वः १२ दशमलव २७ अंकं कुहां वनाः ४८३ दशमलव ६५ अंकय् थ्यंगु दु। विकास बैंक समुह ५ दशमलव ४१ अंकं कुहां वनाः ५७५ दशमलव २४ अंकय् थ्यंगु दु। आपालं फाइनान्स कम्पनीया शेयर भाः कुहां वनेवं थुगु समुहया सुचक नं १ दशमलव ३५ अंकं कुहां वयाः ५५९ दशमलव २ अंकय् थ्यंगु दु। वीमा समुह शुन्य दशमलव २४ अंकं कुहां वनाः ५७५ दशमलव ३६ अंकय् थ्यन। मेखे स्टक एक्सचेन्जय् म्हिगःया कारोबारय् जलविद्युत समुह ३ दशमलव ९७ अंक थहां वनाः ८०१ दशमलव १९ अंकय् थ्यंगु दुसा अन्य समुहया सुचक १ दशमलव १८ अंकं थहां वनाः ५९३ दशमलव ३४ अंकय् थ्यंगु दु ।
स्टक एक्सचेन्जय् शेयर कारोबार जूगु कम्पनी मध्ये पीगु कम्पनीया भाः कुहां वःगु दुसा झिंखुगू कम्पनीया शेयर भाः थहां वन। स्वंगु कम्पनीया भाः धाःसा यथावत कायम जुल। म्हिगःया कारोबारय् ग्वीछद्वः व न्यासः व झिगू कित्ता शेयर न्याये-मी जुयाः न्यागू करोड न्यय्छगू लाख न्यय्द्वः तका दांया कारोबार जूगु दु। बैंक अफ काठमाण्डुया प्रमोटर शेयरं दांया ल्याखं दकलय् अप्वः न्हय्छगू लाख झिंच्याद्वः तकाया कारोबार याःगु दु। अन्नपूर्ण फाइनान्स कम्पनीं अप्वः कमे याःगु दुसा एनआईसी बैंकं अप्वः द्यापं फःगु दु ।
