क्याण्टोनमेन्टया लडाकूत सरकारी कर्मचारी : अर्थमन्त्री
अर्थमन्त्री सुरेन्द्र पाण्डें क्याण्टोनमेन्टया लडाकूत माओवादीया मखसें सरकारी कर्मचारी सरह जूगु खँ धयादीगु दु ।
सरकारी लगानीलय् निर्माणाधीन बोडे उच्च माविया भवन निरीक्षणया झ्वलय् मंगलवाः ख्वपय् वयेकलं १९,६७५ लडाकूतय्त सरकारं लाःया न्हय्द्वः तलब भत्ता बियातःगु धयादिल । वयेकलं लडाकूतय् निंतिं दछि न्ह्यः तक अधिकांश खर्च विश्व बैंकं ग्वाहालि यानाच्वंगु जुसां माओवादी अध्यक्ष प्रचण्डया भिडियो सार्वजनिक लिपाः अज्याःगु ग्वाहालि मवःगुलिं सरकारं हे तलब बियाच्वंगु धयादिल ।
वयेकलं थौं कन्हय् जनताया करं लडाकूतय् भरणपोषण यायेगु ज्या जुयाच्वंगुलिं उपिं माओवादीया मातहतय् स्वयां सेना समायोजन विशेष समितिया मातहतय् च्वनेमाः धयादिल । नेपाली सेना, प्रहरी व मेगू कर्मचारी सरह सरकारं लडाकूतय्त नं तलब भत्ता बियाच्वंगुलिं उपिं माओवादीया लडाकू जुइमफुइगु बिचाः प्वंकादिल ।
अथेहे वयेकल अयोग्य लडाकूयात शिविर पिने यंकेत माओवादीं ग्वाहालि यायेमाःगु धयादिल । वयेकलं माओवादीं लडाकूत थःगु सेना धाःसाः नेपाःया दक्वं राजनीतिक दलं सेना तयार याइगु व अथे याःसाः देशय् युद्ध शुरु जुइगु ख्याच्वः बियादिल ।
