नेवाः राज्य प्रचण्डं घोषणा याइगु

येँ (सन्ध्या टाइम्स)/एकीकृत नेकपा (माओवादी) थीथी नेतात हे वनाः झिंस्वंगू स्वायत्त गणराज्य घोषणा यायेगु तयारीया झ्वलय् थ्वहे वइगु पुस १ गते येँय् तःधंगु सभा यानाः माओवादीया नायः प्रचण्डं हे नेवाः राज्य घोषणा याइगु जूगु दु। नेवाः राज्य घोषणा याये न्ह्यः प्रचण्डं वइगु मंसीर २९ गते सोलुखुम्बुइ वनाः शेर्पा राज्य घोषणा यानादीगु ज्याझ्वः दु ।

थ्व हे झ्वलय् तामाङ राज्य आः काभ्रेया तिमालय् डा. बाबुराम भट्टराईनं पुस ३ गते घोषणा यानादीगु जूगु दु। थ्व सिबें न्ह्यः माओवादी पार्टीं निगूगु चरणया आन्दोलनया झ्वलय् नेवाः राज्य व तामाङ राज्य छन्हुं हे घोषणा यायेगु तयारी याःगु खःसां उगु इलय् तामाङतय्सं बनेपाय् हे तामाङ राज्य घोषणा यायेगु धकाः अडान कायेवं नेवाः व तामाङतय् दथुइ सीमायात कयाः ल्वापु जुइफु धइगु तायेकाः आन्तरिक गृहकार्य मगाःनि धकाः गणराज्यत घोषणा ज्याझ्वः लित काःगु खःसा थुगुसी धाःसा माओवादी व खँयात ध्यानय् तयाः तामाङतय्गु उद्गम लागा कथं नालातःगु काभ्रेया तिमाल लागाय् तामाङ राज्य घोषणा यायेगु ज्याझ्वः तःगु नेवाःतय्गु भावनायात कदर याना खः धकाः माओवादीया छम्ह नेतां 'सन्ध्या टाइम्स' यात कनादिल ।