थौं संविधानसभा न्ह्यःने धर्ना
येँ (सन्ध्या टाइम्स)/ आदिवासी जनजाति वृहत् संयुक्त मोर्चाया नेता व कार्यकर्तात थौं न्हू बानेश्वरस्थित संविधानसभा न्ह्यःने धर्ना च्वंगु दु ।
आत्मनिर्णय नापं जातीय स्वायत्तता व स्वशासनया माग यानाः संविधानसभायात खबरदारी यायेगु कथं थौं ११ बजेनिसें २ बजे तक अथे धर्ना च्वनेगु ज्याझ्वः तयागु खः धकाः उगु मोर्चाया सचिवालय दुजः कुमार योञ्जनं सन्ध्या टाइम्स' यात कनादिल। अथे हे उगु मोर्चां थःपिनि माग पूरा यायेमाः धकाः माग यानाः म्हिगः येँय् सांकेतिक रुपं मसाल जुलुस पिकासें येँया थीथी लागा चाःहिउगु खः। नेवाः स्वायत्त राज्य मंकाः संघर्ष समिति, किराँत खुम्बुवान संयुक्त संघर्ष समिति, ताम्सालिङ संयुक्त संघर्ष समिति, मगरात, गुरुङ, थारु यानाः खुगू जातिया संयुक्त मोर्चा छथासं च्वनाः दयेकूगु उगु वृहत् मोर्चां थौं हे संविधानसभाया नायः सुवास नेम्वाङयात ज्ञापनपत्र लःल्हाःगु दु ।
