प्रतिसरायात श्रेष्ठ सिरपाः
येँ (सन्ध्या टाइम्स)/ साहित्य ख्यलय् बीगु नेपालभाषाया प्रतिष्ठित श्रेष्ठ सिरपाः म्हिगः ज्याझ्वःया दथुइ कवि प्रतिसरा साय्मियात लःल्हात ।
'तिकिनंगु मि' नांगु गद्य कविता सफूया निंतिं कवि साय्मियात नेपालभाषाया जिथिम्ह कवि नारायणदेवी श्रेष्ठं उगु सिरपाः लःल्हानादीगु खः। समारोहय् ताम्रपत्र नापं न्यय्द्धः तका दां लःल्हाःगु खः ।
च्वसापासाया नायः पद्मरत्न तुलाधरया सभापतित्वय् जूगु उगु ज्याझ्वलय् समालोचक कृष्णचन्द्र सिंह प्रधानं विद्रोही स्वभावया कवि साय्मि ल्वापु मथसे स्यानाच्वंगु अनुभूतियात इमान्दार कथं प्वंकेगु ज्या यानादीम्ह खः धयादिल ।
कवि साय्मिं थौंकन्हय् व्यस्तताया कारणं थःगु च्वसा म्हो जक पिहां वयाच्वंगु खःसां याकनं हे थम्हं दुबईया जनजीवन व अनया नेपाःमितय् बारे च्वयेगु खँ कनादिल ।
ज्याझ्वलय् नर्मदेश्वर प्रधानं लसकुस यानादीगु खः ।
