ज्यापु दिवस तःजिक न्यायेकीगु
येँ (सन्ध्या टाइम्स)/वइगु खुक्वःगु ज्यापु दिवसयात लसकुस यायेगु नितिं रेडियो उपत्यका नारायण परिवार क्लबं थीथी ज्याझ्वः याइगु जूगु दु। म्हिगः छगू पत्रकार सम्मेलन यासें ज्यापु दिवस समारोहया नायः चक्रमान डंगोलं उकिया जानकारी बियादीगु खः ।
ज्याझ्वलय् ज्यापुतय उत्थानया लागिं ज्यापु संस्कृति विकास कोष पलिस्था जूगु बारे नं जानकारी बिउगु खः। उगु कोषया मू आज्जु नेवाःतय् तजिलजि, संस्कार, बाजंयात अन्तराष्ट्रिय रुपय् समेत न्ह्यब्वयेगु खः ।
ने.सं.११२५ निसें ज्यापु दिवस (यःमरि पुन्हि) धकाः हनेगु याना वयाच्वंगु खः। नेपाल सरकारं थ्व दिवस कुन्हु सार्वजनिक बिदा नं बियातःगु दु ।
मूल समारोह समितिया भाजु सत्यनारां डंगोलं ज्याझ्वलय् दक्व नेवाःतय्त ब्वति कायेत इनाप यानादिल। थुगुसी ज्यापु दिवस येँया न्यत त्वालं यायेगु तयारी जुयाच्वंगु दु। थुकी प्रधानमन्त्री माधव कूमार नेपालया मू पाहां कथं झाइगु ग्वसाः दु ।
