नेवाः जागरण मञ्चया थीथी ज्याझ्वः
येँ (सन्ध्या टाइम्स)/नेवाः जागरण मञ्चया तदर्थ समितिया मुँज्यां थ्वहे वइगु थिंलागा तृतिया (मंसिर २०) शनिवाः क्षेत्रपाटी पार्टी प्यालेसय् नेवाः स्वायत्त राज्य विषयय् अन्तर्क्रिया यायेगु निर्णय याःगु दु ।
संघीय लोकतान्त्रिक गणतन्त्र नेपाःयात संस्थागत यायेगु झ्वलय् नेवाः स्वायत्त राज्यया नं घोषणा व गठन जुइमाःगु खँय् राजनीतिक दलया नेतातय्गु धापू व दृष्टिकोण कायेगु निंतिं जुइगु उगु ज्याझ्वलय् एकीकृत माओवादीपाखें सभासद् हितमान शाक्य, एमालेया केन्द्रीय दुजः राजेन्द्र श्रेष्ठ, नेपाली कांग्रेसपाखें सभासद् नरहरि आचार्य, नेपाः राष्ट्रिय पार्टीपाखें नायः डा. केशवमान शाक्य व नेवाः स्वायत्त राज्य मंकाः संघर्ष समितिया नायः नरेन्द्रभक्त हाडायात ब्वनातःगु दु ।
मञ्चया बैठकं पुस ११ गते नेवाः स्वायत्त राज्य घोषणा ज्याझ्वः ताःलाकेत मञ्चया कवः कचायात सक्रिय रुपं परिचालन यायेगु निर्णय नं याःगु दु। बैठकं संकिपा मञ्चयात नेवाः स्वायत्त राज्यया निंतिं सांस्कृतिक सभा यायेगु, सुरक्षा मञ्चयात नेवाः सुरक्षाया नितिं स्वयम् सेवकया भूमिका निर्वाह याकेगु, सञ्चार मञ्चयात स्वायत्त राज्यया समाचार फुक्क सञ्चार माध्यमय् थ्यंकेगु व स्वायत्त राज्यया निंतिं जुइगु ज्याझ्वःया प्रचार नेवाः न्ह्यलुवा, थीथी संघसंस्थाया दुजः व सर्वसाधारणयात थ्यंकेगु भाला बीगु, व्यापारी मञ्चयात आर्थिक ग्वाहालि संकलन याकेगु अथेहे मञ्चं टोखा, बुंग, लेले, बज्रबाराहीइ प्रचारसभा याकेगु लिसें विदेशय् स्वनातःगु कवःपाखें अन्तर्राष्ट्रिय रुपं प्रचार प्रसार याकेगु निर्णय नं याःगु दु ।
