नेप्से कुहां वनेगु क्रम जारी
येँ (सन्ध्या टाइम्स)/स्टक एक्सचेन्जय् जुयाच्वंगु शेयर कारोबारं नेप्से परिसुचक थहां वइगु गुगु नं कथंया सम्भावना खने मदुनि। स्टक एक्सचेन्जय् शेयर कारोबारं नेप्से थहां कुहां जुइगुली दकलय् अप्वः प्रभाव लाकीगु वाणिज्य समुहया कारोबार म्हिगः नं कुहां वंगु दु। स्टक एक्सचेन्जय् म्हिगः नं शेयर कारोबार शुरु जुइवं कुहां वंगु नेप्से बजाः बन्द जूगु इलय् तकं कायम जुल ।
दथुइ छन्हु निन्हु त्वःताः वंगु झण्डै प्यला न्ह्यः निसें नेप्से मदिक कुहां वनाच्वंगु दु। म्हिगः नं स्टक एक्सचेन्जय् जूगु शेयर कारोबारय् आपालं कम्पनीया भाः कुहां वनेवं नेप्से परिसुचक ५ दशमलव ४३ अंकं कुहां वनाः ५२८ दशमलव ८९ अंकय् थ्यंगु दु। सेन्सेटिभ इन्डेक्स नं १ दशमलव २६ अंकं कुहां वंगु दुसा फ्लोट इन्डेक्स नं शुन्य दशलमव ५२ अंकं कुहां वंगु दु ।
उखे कारोबार जूगु अप्वः थें वाणिज्य समुहया शेयर कारोबारय् म्हिगः नं भाः कुहां वःगु दु। नेप्सेय् दकलय् अप्वः प्रभाव लाकीगु वाणिज्य बैंक मध्ये एभरेष्ट बैंकया शेयरय् ४७/-, स्टायण्डर्ड चार्टर्ड बैंकया शेयरय् ४१/-, सिदार्थ बैंकया शेयरय् ३७/- तकाया लिसें मेमेगु नं आपालं वाणिज्य समुहया शेयरय् भाः कुहां वयेवं थुगु समुहया उपसुचक ६ दशमलव २७ अंकं कुहां वनाः ४९५ दशमलव ९२ अंकय् थ्यं वःगु दु ।
नेपाल स्टक एक्सचेन्जं बिउगु जानकारी कथं म्हिगःया कारोबारय् नं विकास बैंक समुहया उपसुचक दकलय् अप्वः ९ दशमलव २८ अंकं कुहां वनाः ५८० दशमलव ६५ अंकय् थ्यंगु दु। जलविद्युत समुह ७ दशमलव ३७ अंकं कुहां वनाः ७९७ दशमलव २२ अंकय् थ्यन। अथे हे फाइनान्स समुहया उपसुचक ४ दशमलवव शुन्य ८ अंकं कुहां वयाः ५६० दशमलव ५५ अंकय् थ्यंगु दु। उखे बीमा समुह नं ३ दशमलव १७ अंकं कुहां वयेवं ५७५ दशमलव ६ अंकय् थ्यन।
स्टक एक्सचेन्जय् न्यय्न्यागू कम्पनीया शेयर कारोबार जूगुली स्वीच्यागू कम्पनीया शेयर भाः कुहां वंगु दु। अथे हे न्हय्गू कम्पनीया जक शेयर भाः थहां वंगु दुसा झिगू कम्पनीया शेयर भाः यथावत हे कायम जुल ।
स्टक एक्सचेन्जय् म्हिगः नेप्सेया लिसें छन्हु न्ह्यःया तुलनाय् कारोबार जूगु शेयर ल्याः व दांया कारोबार नं कुहां वःगु दु। म्हिगः चय्छद्वः व न्यय्न्यागू शेयर न्याये-मी जुयाः प्यंगू करोड न्यय्गुंगू लाख व ख्वीगुद्वः तका दांया कोरोबार जुल। छन्हु न्ह्यःया शेयर बजारय् निगू लाख व स्वीन्हय्द्वः व प्यसः व न्यय्गू कित्ता शेयर न्याये-मी जुयाः च्यागू करोड झिंखुगू लाख न्हय्गुद्वः तका दांया कारोबार जूगु खः।
मेखे कारोबार जूगु कम्पनी मध्ये बैंक अफ काठमाण्डौं नं न्यय्स्वंगू लाख ग्वीन्हय्द्वः तका दांया कारोबार याःगु दु। अथ हे नेपाल बङ्गलादेश बैंकं दकलय् अप्वः कमे याःगु दुसा आईसिएफसि वित्तीय संस्था लिमिटेडं दकलय् अप्वः द्यापं
फयेमाल ।
