शासकीय स्वरुप बारे सहमति जुइमफुत
स्थिति तनावग्रस्त जुइवं बैठक स्थगित
संविधानसभा शासकीय स्वरुप निर्धारण समितिया बैठकय् छुं नं छगू दलं स्पष्ट बहुमत ह्येमफेवं गु मतयात आधिकारिक धायेगु बारे विवाद जूगु दु । शासकीय स्वरुप निर्धारण समितिया निवार्चनय् माओवादीं प्रस्ताव याःगु प्रत्यक्ष निर्वाचित राष्ट्रपति व कांग्रेस-एमालेया कार्यकारी प्रधानमन्त्रीया प्रस्ताव निगूलिं अस्वीकृत जूगु दु । अथेहे तराई-मधेश लोकतान्त्रिक पार्टीया अधिकार सम्पन्न राष्ट्रपतिया प्रस्ताव नं अस्वीकृत जूगु दु ।
मुख्य दलत दथुइ सहमति जुइमफेवं मंगलवाः जूगु मतदानय् नं स्वंगूलिं पक्षया प्रस्ताव अस्वीकृत जुइवं सुयाःगु मतयात आधिकारि धायेगु बारे विवाद जूगु दु । समितिया सभापति शम्भु हजारा दुसादं आधिकारिक मत घोषणा यायेत स्वःगु ईलय् उर्जामन्त्री प्रकाशशरण महतं भ्वँ लाकाकायेवं बैठकय् छुं ई तनाव जूगु खः । लिपाः थुकीया बारे सभामुख नाप सहलह यानाः क्वःछीगु सहमति नापं थौंया बैठक स्थगित जूगु खः ।
थ्वस्वयां न्ह्यः बैठकय् जूगु निर्वाचनय् माओवादीया प्रस्तावया पक्षय् १८ मत व विपक्षय् २० मत कुतुंवंगु खःसा कांग्रेस-एमालेया प्रस्तावय् १६ मत व विपक्षय् २१ वःगु खः । अथेहे तमलोपाया प्रस्तावया पक्षय् ३ मत विपक्षय् ३१ लाःगु खःसा ४म्ह सभासद् तटस्थ च्वंगु खः ।
पीनिम्ह दुजः दुगु शासकीय स्वरुप निर्धारण समितिलय् स्वंगूलिं प्रस्ताव अस्वीकृत जुइवं माओवादी सभासदतय्सं संख्याया आधारय् थःगु पक्षय् बहुमत वःगु दाबी याःगु खःसा मेगू दलतय्सं धाःसाः सुयां नं पक्षय् आधिकारिक बहुमत मवःगुलिं सहमतिया आधारय् विवादित विषयात क्वचायेके माःगु खँ धाःगु खः ।
