चितवन निकुञ्ज दुने होटल चलेयाये दइगु
सरकारं चितवन राष्ट्रिय निकुञ्ज दुने स्वदँया निंतिं होटल चलेयाये बीगु निर्णय याःगु दु ।
मंगलवाः सुथय् च्वंगु मन्त्रिपरिषदया बैठकं सरकारयात पुले ल्यं दनीगु कर पुलाः स्वदँया निंतिं होटल चालेयाये बीगु निर्णय याःगु खः । राष्ट्रिय निकुञ्ज व वन्यजन्तु संरक्षण विभागं राजस्व व संरक्षण शुल्क ईलय् हे भुक्तानी मयाःगु धासें असार मसान्त निसें चितवन राष्ट्रिय निकुञ्ज दुने न्हय्गू होटल रिसोर्ट चलेयाये मब्यूगु खः ।
अथेहे मन्त्रिपरिषदया बैठकं बाबुलाल प्रसाद शहायात औषधि व्यवस्था विभागया महाप्रवन्धक नियुक्त याःगु दुसाः प्रमुख सेनानी डा. गोपाल महर्जनयात प्राविधिक महासेनानी व महासेनानी ताजमान सिंह बस्न्यातयात हवाई सुरक्षा निर्देशनालय स्वइगु सहायक रथीलय् बढुवा याःगु दु । अथेहे अतिरिक्त प्रहरी महानिरीक्षक अर्जुन बहादुर शाहीयात डार्फरय् च्वंगु संयुक्त राष्ट्रसंघ मिसनय् छ्वयेगु अनुमति बैठकं ब्यूगु दु ।
अथेहे मन्त्रिपरिषदया बैठकं संचार मन्त्रालयया संयन्त्र न्हय्न्यागूलिं जिल्लाय् विस्तार यायेगु निर्देशिकायात अनुमोदन याःगु दु । नापं बैठकं किराँत धर्मगुरु महागुरु फाल्गुनन्दयात राष्ट्रिय विभूति घोषणा याःगु दु ।
