दलत मिले जुइगुया विकल्प मदु : सभामुख
सभामुख सुवास नेम्वाङं याकचा वंसाः सुं नं लक्ष्य थ्यंकेमफइगु धयादिसें राजनीतिक दलत मिले जुइगुया विकल्प मदुगु धयादिल ।
प्रेस चौतारी पत्रकारित सिरपा पाखें वरिष्ठ पत्रकार माधव शर्मायात मंगलवाः पोखराय् सम्मान यानादिसें वयेकलं दलतय्सं हे दये थाकूगु अवस्थाय् थ्यंगु धयाच्वंगु ईलय् उपिं छाय् मिले जुया वनेमफुगु धकाः न्ह्यसः तयादिल । वयेकलं संविधान निर्माण व मेगू निर्वाचन तक दलत मिलेजुया वनेगुया विकल्प मदुगु खँ स्पष्ट यानादिल ।
संविधान विघटन जुइ धकाः ब्वलनाच्वंगु हल्लाया ल्यूने सुं नं मवनेत सभामुख नेम्वाङं इनाप यानादिल । वयेकलं न्हूगु संविधान दक्वं नेपाःमितय् मंकाः दस्तावेज जूगुलिं राजनीतिक दलया नापं तराई, मधेश, आदिवासी, जनजाति, दलित, ल्यूनेलाःगु वर्ग, क्षेत्र दक्वं मिलेजुया वनेमाःगु खँय् बः बियादिल ।
वयेकलं संविधान सभाय् छुं नं छगू जक दलं स्पष्ट बहुमत महःगु खँ न्ह्यथंनादिसें जनतां दक्वं राजनीतिक दलत छप्पँ जुयाः वनेमाः धकाः हे छगू जक दलयात स्पष्ट बहुमत मब्यूगु धयादिल वयेकलं जनताया भावनायात कदर यासें सहमति व सहकार्य यानाः वनेगुया विकल्प मदु धयादिल ।
