दलित मुक्ति मोर्चा पाखें चक्का जाम
नेपाल राष्ट्रिय दलित मुक्ति मोर्चां मंसीर १९ गते सुथय् झितात्या इलंनिसें झिंनिता ई तक चक्का जाम यायेगु घोषणा याःगु दु ।
नागरिक सर्वोच्चताया माग यासें आन्दोलनरत एकीकृत नेकपा (माओवदी)या आन्दोलनयात ग्वाहालि जुइकथं चक्काजामया घोषणा याःगु मोर्चां जानकारी ब्युगु दु ।
मोर्चाया केन्द्रिय ज्याकु बुद्धनगरय् थौं पत्रकार सम्मेलनया ग्वसा:ग्व:या उगु ज्याभझ्वःया घोषणा याःगु खः । स्वनिगलय् विरोधसभा सहितया चक्काजाम याइगु मोर्चां जानकारी ब्युगु दु । राष्ट्रपतिया असंवैधानिक पलाः भिंकेत व वर्तमान सरकार विघटन यानाः राष्ट्रिय संयुक्त सरकार गठन यायेमाःगु मोर्चाया माग दु ।
पत्रकार सम्मेलनय् न्वंवासें माओवदी पोलिटब्यूरो दुजः विश्वभक्त दुलाल 'आहुतीं' समानुपातिक व आरक्षणया कोटां जक थःपिंत मगाइगु धासें दलिततय्त विशेषअधिकार बिइमाःगु धयादीगु दु । अथेहे दलित मुक्ति मोर्चाया नाय तिलक परियारं संयुक्त राष्ट्रिय जनआन्दोलन समितिं घोषणा याःगु आन्दोलनय् उर्जा थप यायेत थःपिंसं उगु ज्याझ्वःया घोषणा यानागु धयादीगु खः ।
