'गणराज्य घोषणा संघीयताय् वनेगु निंतिं सांकेतिक दवाव'

एकीकृत नेकपा (माओवादी)या न्वकु डा. बाबुराम भट्टराईं स्वायत्त गणराज्य घोषणा याना: माओवादीं समानान्तर सरकारया अभ्यास यायेत स्वगु स्पष्ट याःगु दु ।

स्वन्हुया कोरीया भ्रमणपाखें स्वदेश लिहांवयेगु झ्वलय् त्रिभुवन अन्तराष्ट्रिय विमानस्थलय् संचारकर्मीलिसे खँ ल्हासें डा. भट्टराईं गणराज्यतय्सं छु नं प्रशासनिक ज्या मयाइगु प्रष्ट यानादिल । स्वायत्त गणराज्य घोषणा याना माओवादीं सरकारयात संघीयताय् वनेगु निंतिं सांकेतिक दवाव बिइत जक स्वगु भट्टराईया बिचा खः । वय्कलं माओव‍ादीया उगु ज्याझ्वःपाखें संघीयता विरोधी तत्वतय्सं म्हितीगु थाय् मदइगु तर्क यानादिल । थःपिं सहमतीपाखें हे राजनीतिक समस्या समाधान जुइमा धइगु बिचा दुगु धासें वय्कलं सहमतीया निंतिं राष्ट्रपतिया पला भिंकेमाःगु धयादिल ।