सतकं मखु संसदं प्रधानमन्त्री जुया क्यं : गृहमन्त्री
गृहमन्त्री भीम रावलं माओवादीं सतकं प्रधानमन्त्री फ्वनाः लोकतान्त्रया उपहास याःगु द्वपं बियादीगु दु । वयेकलं माओवादीयात लोकतान्त्रिक विधि मार्फत संसदं माओवादी नेतृत्वया सरकार गठन यानाः क्यनेत नं हाथ्या बियादिल । वयेकलं वर्तमान सरकार छुं नं हालतं क्वमदलीगु दाबी नं यानदिल ।
सोमवाः चरिकोटय् जूगु छगू ज्याझ्वलय् न्ववानादिसें वयेकलं वर्तमान सरकार दक्षिणपन्थीया इसाराय् चले जूगु धका: माओवादीं ब्यूगु द्वपंया खण्डन यानादिसें माओवादीं हे थ्व सरकार विरुद्ध दक्षिणपन्थी चशमा तःगु द्वपं बियादिल ।
वयेकलं माओवादीं यायेत्यंगु आन्दोलनं जनतायात थाकूइगु धायादिसें अज्याःगु आमहड्तालया छुं औचित्य मदुगु धयादिल । वयेकलं माओवादीयात आन्दोलनया ज्याझ्वः लितकयाः सहमतिया मूलधारय् वयेत नं इनाप यानादिल ।
अथेहे मेगु छगू प्रशंगय् गृहमन्त्री रावलं कृषि राज्यमन्त्री करिमा बेगमं द्वंकूगु धकाः सार्वजनिक रुपं महसुस यायेधुंकूगुलिं वयेकयात कारवाही मयानाःगु धयादिल ।
