'वर्तमान सत्ता गठबन्धन संघीयता विरोधी'
एनेकपा (माओवादी)या अध्यक्ष पुष्पकमल दाहाल 'प्रचण्डं' वर्तमान सरकारं माओवादीं यायेत्यंगु स्वायत्त गणराज्य घोषणाया विरोध यानाः संघीयताय् वनेमबीगु चालबाजी यानाच्वंगु द्वपं बियादीगु दु । वयेकलं वर्तमान सत्ता गठबन्धन संघीय गणतन्त्र विरोधी जूगु दाबी यानादिल ।
लिम्बु जातिया चासोक इङ्नाम नखःया लसताय् सोमवाः संयुक्त लिम्बुवान मोर्चा येँ याःगु ज्याझ्वलय् न्ववानादिसें वयेकलं अन्तरिम संविधानय् संघीय गणराज्य धकाः न्ह्यथंने धुंकूसां परोक्ष रुपं संघीयता पाखे वनेमबीगु चालबाजी जुयाच्वंगु धयादिल । वयेकलं अज्याःगु चालबाजीयात जनतां सफल जुइमबीगु दाबी यानदिल ।
माओवादी अध्यक्ष प्रचण्डं वर्तमान सत्ता गठबन्धन अस्वाभाविक व अप्राकृतिक जूगु धयादिसें थ्व संघीय गणतन्त्र विरुद्ध परिलक्षित जूगु धयादिल । वयेकलं सरकार व उकीया गठबन्धन दलत संघीयताय् वने चाहे मजूसां जनताय् जातीय, लैंगिक, वर्गीय चेतना वयेधुंकूगुलिं संघीय गणतन्त्र स्थापना जुइगु दाबी यानादिल ।
ज्याझ्वलय् सभामुख सुवाषचन्द्र नेम्वाङं सहमति बिनाः शान्ति प्रकृया निष्कर्षय् थ्यनेमफइगु धयादिसें सहमति मजूसाः न्हूगु संविधान नं च्वयेमफइगु धयादिल । वयेकलं शान्ति प्रकृया व संविधान च्वयेत दक्वं दलयात छप्पँ जुइत इनाप यानादिल । निर्धारित ईलय् संविधान च्वयेमफुसाः आः प्राप्त उपलब्धी नं तनावनीगु खँ वयेकलं धयादिल ।
