अधिकार उल्लघंकर्तायात कारवाही याः : रिचार्ड बेनेट
संयुक्त राष्ट्रसंघीय मानव अधिकार उच्चायुक्त नेपाः स्थित प्रतिनिधि रिचार्ड बेनेटं कानुन स्वयां च्वये सुं नं मदुगुलिं अधिकार उल्लघंकर्तायात कारवाही यानाः दण्डहीनतया अन्त्य यायेमाःगु खँ धयादीगु दु ।
संयुक्त राष्ट्रसंघीय मानव अधिकार ज्याझ्वः नापं सहकार्यय् नागरिक समाजया निंतिं सफूया पोखराय् सोमवाः उल्लेज्या यानादिसें बेनेटं नेपालय् द्वन्द्व न्हापा व द्वन्द्व लिपाः मानव अधिकार उल्लघंनया घटना जुयाच्वंगु व बृहत शान्ति सम्झौता लिपाः नं दण्डहीनता कायम हे जूगु धयादिल ।
नेपाःया नागरिक समाजं जनआन्दोलनया ईलय् व बृहत शान्ति सम्झौताय् म्हितुगु भुमिका व ग्वाहालियात अझ नं निरन्तरता बीत वयेकलं इनाप यानादिल । वयेकलं संविधान निर्माण व संविधानय् मानव अधिकारया विषययात गु कथं सम्बोधन यायेगु धइगु विषयलय् नं महत्वपूर्ण भुमिका म्हितेत नागरिक समाजयात इनाप यानादिल ।
बेनेटं नागरिक समाजया दुजः व गैरसरकारी संस्थायात अन्तराष्ट्रिय मानव अधिकार संयन्त्रया बारे जानकारी बीया व्यवहारिक रुपं ग्वाहालि यायेगु ताः तयाः थुगु सफू पिथनाःगु कनादिल ।
