माओवादीं धाः थें संविधान निर्माण जुइमखु : देउवा
नेपाली कांग्रेसया वरिष्ठ नेता शेरबहादुर देउवा माओवादीं धाः कथं संविधान निर्माण मजुइगु खँ धयादीगु दु ।
नेपाल प्रेस युनियन सुनसरीं सोमवाः इटहरीलय् याःगु ज्याझ्वलय् न्ववानादिसें वयेकलं माओवादीं माग याःगु कथं जनगणतन्त्रात्कम संविधान निर्माण यायेमफइगु व अज्याःगु संविधान निर्माण जुइगु सम्भावना नं मदुगु दाबी यानादिल ।
वयेकलं माओवादीं स्वंगूगु चरणया आन्दोलन घोषणा यानाः मुठभेडया राजनीति यायेत स्वःगु द्वपं बियादिल । वयेकलं माओवादीं संविधान निर्माण यायेगु ईलय् गणराज्या घोषणा यायेगु कथंया आन्दोलन घोषणा यानाः जनताय् भ्रम ब्वलंकूगु धयादिल । वयेकलं प्रतिस्पर्धात्मक राजनीतिलय् वयेधुंकाः नं माओवादी आन्दोलन याःगु व शान्ति सम्झौता विपरीत ज्या यानाः राजनीतिक बेइमानी याःगु द्वपं बियादिल ।
पुलांम्ह प्रधानमन्त्री नं जुयादिम्ह देउवां सहमति व सहकार्य बाहेक मेगू विकल्प मदुगु धयादिसें माओवादीं आन्दोलनयात निरन्तरता ब्यूसाः देय् खतरा लाइगु धयादिल । वयेकलं संविधान च्वये न्ह्यः हे माओवादी लडाकूतय् व्यवस्थापन व समायोजन यायेमाःगु खँय् बः बियादिल ।
