थौं माओवादीं नेवाः राज्य क्वःछीगु
येँ (सन्ध्या टाइम्स)/एकीकृत नेकपा (माओवादी) स्थायी समितिया दुजः, जातीय क्षेत्रीय महासंघया केन्द्रीय दुजः व थीथी राज्यया इञ्चार्जपिनिगु थौं च्वनाच्वंगु मुँज्यां नेवाः राज्यया लागा गुलि धकाः क्वःछीगु जूगु दु ।
माओवादीया जातीय क्षेत्रीय महासंघया मूछ्याञ्जे नापं सभासद सुरेश आलेमगरं 'सन्ध्या टाइम्स' लिसे ल्हासें थौंया मुँज्यां नेवाः व तामाङ राज्यया वैज्ञानिक सिमांकन यायेगु बारे निर्णय जुइगु जानकारी बियादिल ।
म्हिगःनिसें न्ह्याःगु उगु मुँज्याय् तामाङतय्सं नेवाः राज्यय् स्वंगू जिल्ला येँ, यल व ख्वप जक जुइमाः धकाः खँ तःगु अले नेवाःतय्सं धौख्यः, पन्ति व भ्वत नं नेवाः राज्यय् लायेमाः धकाः माग याःगु खँ सीदुगु दु। तामाङतय्सं धौख्यः, पन्ति व भ्वँतयात नेवाः राज्यय् लाकेगु खःसा यल जिल्लाय् लाःगु तामाङ बाहुल वस्ती ताम्सालिङय् दुथ्याकेमाः धकाः माग याःगु खँ नं सीदुगु दु ।
माओवादीं झिंस्वंगू स्वायत्त गणराज्यत घोषणा यायेगु तयारीया झ्वलय् उगु मुँज्या च्वनाच्वंगु खः ।
