परिषद् बैठकय् प्रचण्ड मथ्यं
येँ (सन्ध्या टाइम्स)/ताःई न्ह्यवंनिसें च्वने मफयाच्वंगु संवैधानिक परिषद्या बैठक थौं सुथय् च्वंसां थुकिं न्हूम्ह प्रधान न्यायाधीशया नां छगू सिफारिस यायेगु बाहेक मेगु ज्या धाःसा याये मफुत। बैठकय् प्रमुख प्रतिपक्षीपाखें वयेमाःम्ह माओवादी अध्यक्ष प्रचण्डं ब्वति कयामदी। अथे खःसां वय्कलं परिषद्या नायः एवं प्रधानमन्त्री माधव नेपालयात फोन यानाः बैठकय् थःपिं वये मखु तर प्रधानन्यायाधीश पदय् अनुपराज शर्माया नां सिफारिस यायेगु खःसा उकी थःपिनि समर्थन दु धकाः जानकारी बियादीगु खः। प्रचण्डपाखें थ्व सुचं वयेधुंकाःलि तिनि थौंया बैठक च्वंगु खःसा बैठकं वयां अप्वः मेगु छुं ज्या नं मयाः।
थौंकन्हय् खाली जुयाच्वंगु महालेखा परिक्षक, लोकसेवा आयोग, निर्वाचन आयोग आदि थाय्या प्रमुख सिफारिस यायेगु ज्या नं थ्व परिषदं यायेमाःगु खः। तर परिषद्या बैठक हे च्वने मफुगुलिं थुपिं निकायय् नियुक्तिया ज्या नं मजुयाच्वंगु खः। बैठकय् तःन्हु न्ह्यवंनिसें प्रमुख प्रतिपक्षी नेता प्रचण्डं ब्वति कयाच्वंगु मदु ।
