नेपाःयात ल्वःगु लघु जलविद्युत
देशय् उर्जाया अभाव जुयाः न्हिं १६ घौ लोडशेडिङ यायेमाःगु अवस्था पिहां वयेवं निजी क्षेत्रया उद्योगपतितय्सं लघु जलविद्युत परियोजनात शुरु यायेगु बारे सम्मेलन याःगु दु । सम्मेलनय् नेपाःया लागिं लघु जलविद्युत छाय् आवश्यक खः व थुकियात न्ह्याकेगु लागिं छु यायेमाः धइगु विषयय् सहलह न्ह्यात ।
खतुं थज्याःगु सहलह आः मखु देशय् लोडशेडिङया मार शुरु जुइ न्ह्यः हे न्ह्याकाः नं ज्या शुरु यायेमाःगु खः । नेपाः मेमेगु थें धनी देय् मखु । चीधंगु परियोजना जूसा नेपाःया पुँजी व नेपाःया हे क्षमतां दयेके फइ । उकिया साचालन व मर्मतया ज्या नं नेपाःया हे प्राविधिकंयाये फइ । लिसें अप्वः संख्याय् चिचीधंगु परियोजनात दइबलय् छुं जुयाः छगू स्यंसां मेमेगुलिं ज्या यानाच्वंगु दइ । स्यंगु परियोजना मर्मत जुयाच्वंसां मतया उत्पादनय् कमी वइ मखु । तःधंगु परियोजना स्यन धाःसा दयेकेत बन्द यायेमाली गुकिं यानाः मत स्यायेमाःगु अवस्था वया बी । तर वंगु तःदँ तक नेपाःया जल प्रशासनयात यक्व कमिशन वइगु लोभ क्यनाः ततःधंगु जक परियोजनाया म्हगसय् ब्वाका तल । तर अन्तिमय् वयाः न उमिसं अज्याःगु परियोजना हे शुरु यायेफत न चीधंगु हे गुगुं शुरु यात । छुं हे याये मफुगुया लिच्वः स्वरुप थौं देय् तःधंगु उर्जा संकटय् फँसे जूवन ।
सरकारं मयाःसां उद्योगपतित थःहे जानाः चीधंगु जलविद्युत परियोजना बारे बिचाः शुरु याःगु दु । थुकियात तुरुन्त कार्यान्वयनय् यंकेगु लागिं आः ज्या नं न्ह्याकेमाःगु दु । चीधंगु परियोजनाया लागिं माःगु पुँजी व प्रविधि नेपालय् हे उपलब्ध दु । थुकिया लागिं आः ताःहाकः विवाद यानाच्वनेमाःगु आवश्यकता मदु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
