पर्यटकया निंतिं ख्वप नाइट
ख्वप (सन्ध्या टाइम्स)/ख्वपया थीथी सांस्कृतिक परम्परा व जन जीवनया लु न्ह्यब्वयाः पर्यटन प्रवर्द्धन यायेगु ताः तयाः ख्वपया लाय्कुली शनिवाः ख्वप नाइट जुल ।
सिद्धि स्मृति प्रतिष्ठानया लिसें थीथी संस्था जानाः पर्यटकतय्त दतात्रय निसें लाय्कुली तक माकःचा प्याखं व सुकुन्दा ज्वनाः लसकुस याःगु खः। ज्याझ्वलय् देवी प्याखं, महाकाली प्याखं, ख्याः प्याखं, ज्यापु ज्यापुनी प्याखं नापं कुमारी यात्रा नं न्ह्यब्वःगु खः ।
ख्वप पर्यटन विकास समितिया ग्वाहालिं न्ह्याःगु उगु ज्याझ्वलय् अन वःपिं पर्यटकतय्त ख्वपया जनजीवनय् आधारित भारा छिनाच्वंगु, कपाय् फ्यनाच्वंगु, इताः कयाच्वंगु, थाज्या यानाच्वंगु आदि न्हिथंया दिनचर्या नं न्ह्यब्वःगु खः ।
ज्याझ्वलय् ब्वति काःपिं पर्यटकतय्त नेवाः नसा नकेगुया लिसें पर्यटकतय्त घेन्टांघिसी म्हितकेगु ज्या नं जूगु खः ।
