नेवाः राज्य बारे माओवादीइ सहलह
येँ (सन्ध्या टाइम्स)/ एकीकृत नेकपा (माओवादी)या राज्य पुनरर्संरचना समिति दुने नेवाः स्वायत्त राज्यया लागा गनंनिसें गत तक जुइ धइगु विषययात कयाः थौं सुथंनिसें सहलह जुयाच्वंगु खँ सीदुगु दु ।
उगु सहलह ज्याझ्वलय् वइगु पुस १ गते नेवाः राज्य धकाः गुलि लागायात घोषणा यायेगु खः धइगु बारे बिचाः ब्याकेगु ज्या जुयाच्वंगु खँ सम्बद्ध नेतातय्सं धाःगु दु ।
विशेष यानाः तामाङ व नेवाः राज्यया विषययात कयाः पार्टी दुने नं कचवं ब्वलंगु कारणं थुकियात कयाः थौं गम्भिर रुपं हे सहलह यानाः क्वःछीगु खँ माओवादीया छम्ह नेतां 'सन्ध्या टाइम्स' यात कनादिल ।
थौंया मुँज्याय् माओवादीं घोषणा याइगु थीथी राज्यया सिमाना बारे नं गम्भीर रुपं सहलह ब्याकीगु खँ धाःगु दु।
माओवादीं थःपिनि अवधारणाय् झिंस्वंगू राज्य घोषणा यानातःगु दुसा थःपिनि आन्दोलनया झ्वलय् थीथी गणराज्य घोषणा याना वनेगु तयारी नं माओवादीं यानाच्वंगु दु।
थीथी राज्य घोषणा यायेगु ज्याझ्वःयात मेगु राजनीतिक पार्टीतय्सं धाःसा विरोध यानाच्वंगु दु ।
