बौद्ध सम्मेलन पुस २ व ३ गते
येँ (सन्ध्या टाइम्स)/ धर्मोदय सभां 'लुम्बिनी विकास राष्ट्रिय प्रतिष्ठा' धइगु मू नारा ज्वनाः यायेत्यंगु झिक्वःगु राष्ट्रिय बौद्ध सम्मेलन वइगु पुस २ व ३ गते याइगु जूगु दु ।
माओवादीं थ्वहे वइगु पुष ५, ६ व ७ गते नेपाल बन्द घोषणा याःगुलिं धर्मोदय सभां न्हापा हे घोषणा यानातःगु पुष ४ व ५ गतेया थःपिनि सम्मेलन न्ह्यकाःगु खः ।
बन्दं यानाः सम्मेलनय् लिच्वः लायेफु धासें सभां २ व ३ गते यायेगु खँ क्वःछिउगु जानकारी प्रचार प्रसार उप समितिया कजि नविन चित्रकारं बियादिल ।
सम्मेलनया झ्वलय् पुष १ गते धर्मोदय सभां लुम्बिनीइ दयेकूगु चैत्यय् बुद्धया मूर्ति नं पलिस्था याइगु ज्याझ्वः दु। धर्मोदय सभाया दुजः भाइराजा तुलाधरं दान यानादीगु उगु मूर्ति पलिस्था याइगु इलय् बज्रयानीपाखें सप्तविधानोत्तर व न्यास पुजा, थेरवादीपाखें परित्राण पाठ अले महायानीतपाखें रम्नी पुजा याइगु ग्वसाः दु ।
अथे हे धर्मोदय सभां कन्हय् छगू ज्याझ्वःया दथुइ थःपिनि ६६ क्वःगु बुदिं हनीगु जूगु दु। बुद्ध विहारय् विशेष ज्याझ्वः यानाः बुदिं हनेगु तयारी जुयाच्वंगु खँ धर्मोदय सभां धाःगु दु ।
