पशुपतिया पुजारी नेवाः ब्रम्हू जुइमाः
पशुपतिनाथया देगलय् भारतीय पुजारीयात चीकाः आः नेपाःया हे पुजारी तयेगु परम्परा शुरु याःसां थ्व नेपाली पुजारी धइम्ह नेवाः ब्रम्हू जुइमाःगु माग स्थानीय जनतां यानाहःगु दु । मल्लकालय् भारतीय पुजारी नियुक्ति याये न्ह्यः अन नेवाः ब्रम्हूतय्सं पुजा यायेगु परम्परा दुगु खँ धाःगु दु । समाजसेवी नरोत्तम वैद्यया कथं पशुपतिइ पुजा याइम्ह अन्तिम नेवाः पुजारी विश्वानन्द राजोपाध्याय खः । उमिगु पुस्ता थौंकन्हय् येँया किलागलय् च्वनाच्वंगु दुसा उमिसं थौं नं सांकेतिक रुपं पशुपतिया दक्षिणमूर्ति पुजा यानाच्वंगु खँ नं धाःगु दु ।
स्थानीय नेवाःतय्सं यिद भारतीय पुजारीयात चीकाः नेपाःया परम्परा न्ह्याकेगु खःसा अन नेवाः पुजारी हे तयेमाःगु माग याःगु दु ।
मूलभट्ट नापं भारतया स्वम्हं भट्टतय् राजीनामा लिपा सरकारं अन डा. विष्णु प्रसाद दाहाल व शालिकराम ढकालयात नियुक्त याःगु दु । पशुपतिया पुजापरम्परालिसे थुमिगु छुं नं स्वापू मदुगु खँ धाःगु दु । थुमिसं संस्कृत भाषाय् शास्त्री यानातःगु धइगु लिधंसाय् पुजारी नियुक्त याःगु खः । पशुपतिया पुजालिसे सम्बन्धित सुं नं मनूतय्सं थुमित म्हमसिउ ।
उखे थिनंनिसें पशुपतिइ न्हूम्ह पुजारी वइगु व मेखे अन नेवाः ब्रम्हूयात पुजारी दयेकेमाः धइगु हुइनाभुइना नं शुरु जूगुलिं पशुपित लागाय् स्वंगः ट्रक प्रहरी हयाः सुरक्षा बियातःगु दु । थ्व बारे पशुपति विकास कोषं धाःसा छुं न्ववाःगु मदुनि ।
