नेवाःतय्सं विगतय् जूगु मनोवैज्ञानिक दवावया क्षतिपूर्ति कायेमाः

येँ (सन्ध्या टाइम्स)/नेवाः सामाजिक रुपान्तर विषयय् नेपाः राष्ट्रिय पार्टीं म्हिगः छगू तःजिगु गोष्ठी यात। भविष्यय् नेवाःतय्गु भूमिका बारे लँपु ज्याना वनेगु ताः तयाः उगु गोष्ठीया आयोजना याःगु खः।
नेवाः सामाजिक रुपान्तर बारे थीथी खलः पुचः व व्यक्तिलिसे अन्तर्क्रिया यानाः पिहां वःगु लिच्वःयात अन ज्यापौया रुपय् न्ह्यब्वःगु खः ।

ज्याझ्वलय् 'नेवाः सामाजिक रुपान्तरण अध्ययनया मू लिच्वः' विषयक थःगु ज्यापौ न्ह्यब्वसें मोहन दास मानन्धरं नेवाःतय् दथुइ जातीय आधारतय् रुपान्तरण जुयाः 'एसिमिलेट' जुइगु सम्भावना अप्वया वनाच्वंगु खँ कनादिल। नेवाःतय् जातीय व पेशागत म्हसीका बुलुहुँ तना वनाच्वंगु खँ न्ह्यथँसें ज्यापती थौंकन्हय् नेवाःतय्त मुख्य लागां पिने च्वं वनेगु, मस्त विदेश वनीगु, मांभाय् ल्हायेगु त्वःतेगु, राज्यया थीथी संरचनाय् पहुँच त्वःफिना वनेगु थेंज्याःगु समस्यात वयाच्वंगु खँ नं उल्लेख यानातःगु दु।
अथे हे डा. त्रिरत्न मानन्धरं 'इतिहासया पानाय् नेवाःत' शीर्षकया ज्यापौ न्ह्यब्वसें इतिहासया थीथी कालखण्डय् विशिष्ट थाय् दुपिं नेवाःत कालान्तरय् वयाः कुहां वनाच्वंगु किपा न्ह्यब्वयादिल ।

जुलिया चित्रकारं 'नेवाःतय् सामाजिक रुपान्तरण' विषयक ज्यापौ न्ह्यब्वसें नेवाःत पुलांगु सामाजिक स्वरुपं पिहां वयाः न्हूगु स्वरुपय् दुहां वनाच्वंगु खँ कनादिल। थौंकन्हय् पिने जिल्लाय् वंपिं नेवाःतय्सं थःपिनि थर त्वःताः श्रेष्ठ वा प्रधान च्वयेगु याना हःगु, नेवाः नेवाः दथुइ जातीय बन्देज मदया वंगु, गुभाजु पुरेत तयेगु चलन म्हो जुया वःगु, हिन्दू नेवाःतय्सं नेवाः ब्रम्हू स्वयां खय् ब्रम्हूत पुरोहित तयेगु अप्वयेका हःगु, नेवाःतय् संस्कारय् थीथी जाति विशेषं यायेमाःगु ज्याखँत आः त्वःता हःगु आदियात नेवाःतय् सामाजिक रुपान्तरणया सूचकया रुपय् उकी न्ह्यथनातःगु दु
।

अथे हे लजना मानन्धरया 'नेपाःया राजनीतिक व आर्थिक परिवर्तनय् नेवाःतय्गु थाय्' विषयक ज्यापौ नं अन न्ह्यब्वःगु खः ।

उकथं हे डा. पुष्पा श्रेष्ठं नेवाः अग्रगमनया लागिं झिगू बुँदाया कार्य योजना न्ह्यब्वयादिल। उकी नेवाःत छप्पँ यायेत अभियान न्ह्याकेमाःगु, विगतय् नेवाःतय्त राज्यसत्तां लाका तःगु मनोवैज्ञानिक दवावया निंतिं क्षतिपूर्ति माग यायेमाःगु, थःपिनि गुथिया जग्गा व सम्पत्ति लित कायेया लागिं आवश्यक पलाः न्ह्याकेमाःगु आदि सुझाव बियातःगु दु।
अन न्ह्यब्वःगु ज्यापौयात कयाः पद्मरत्न तुलाधर, डा.सुमित्रा मानन्धर गुरुङ, सानुराजा शाक्य, गजेन्द्र मानन्धरपिंसं टिप्पणी यानादीगु खः ।

नेपाः पार्टीया नायः डा. केशवमान शाक्यया सभापतित्वय् जूगु उगु ज्याझ्वलय् पार्टीया न्वकु सुवर्णकेशरी चित्रकारं लसकुस व नरेशवीर शाक्यं सुभाय् देछानादीगु खः। न्वकु डा. रमेशकुमार श्रेष्ठं ज्याझ्वः बारे कनादीगु खःसा सभासद् बुद्ध साय्मिं नं न्ववानादीगु खः ।