रत्नपार्कय् ख्वयाच्वंम्ह मचा
पुष्प मूनंकःमि
कतन्त्र धाःगु वँय्तन्त्र वये धुंकाःलि थन थीथी तरिकां लँय् तमाशा क्यनेगु अभियान जुयाच्वंगु इलय् थ्व पालय् जंगली छाःकी थें ग्वाय् दुम्ह मचा छम्ह ग्वारा-ग्वारातुलाः ख्वयाच्वन। व ख्वःगु सुनानं वास्ता मयात धकाः। आः जूबलय् वं माइक हे तयाः सः सुक्क ख्वयाच्वन। थन ला खाते मचात जक बा नयेमाल, बा नये पित्यात धकाः अफिस ई जुल की ओभर हेड ब्रिजय् ग्वारातुलाः थम्हं तुं तुति थरथर खाकाः ख्वइगु खनागु खः। अज्याःपिं मचात खनाः कन्नाचायाः नयेगु बीबलय् मकाइगु, ध्यबा बिल धाःसा जक काइगुलिं जि थ्व मचायात नं वास्ता मयासे वना। तर थ्व मचा ला मेपिं स्वयां यक्वं पाःगु अले कोट पाइन्ट फिना तःगुलिं जिगु ध्यान साला काल। थज्याःम्ह मचा धाथें खाते खइ मखु जुइ धकाः निर्णय यायेत जितः इण्डिया बा अमेरीकी दूत नापलानाः छलफल यानाच्वने हे म्वाःल। जि लिफः पुलाः लिहां वना, मचा धाःसा गबलें तिंतिं न्हुयाः, गबलें ग्वाराग्वारातुलाः ख्वया हे च्वन तिनि ।
जिं मचायात न्यना, ''बाबु ! छ ख्वयाच्वंगु, हालाच्वंगु यक्व हे दयेधुंकल। अले यक्वसिनं ह्येकः नं वयेधुंकल तर नं छंगु ख्वःसः धाःसा मदिउगु हे मखु। छाय् छु जुल? नये पित्यानाः ख्वयागु ला?'' वं मखु धकाः छ्यं संकल। मखुसा चिकुयाः ख्वयागु ला? व नं मखु धाल। प्वाथय् दुपिंसं थियाः अर्हिंचाःगु ला? व नं मखु। थय्क स्वयेबलय् ला मचासू पिहां वयेमाःम्ह जुइधुंकल छ। अथेसां न्ह्यवःसा मालाः जकं ख्वःगु ला? तर वं व नं मखु धाल। जिं छु छु न्यना, वं न्यना न्यनागु मखु धाल। व ख्वःगु हाःगु सः न्यनां न्यने मजियाः कायल जुयाः वं छु धाल जिं याना बी धया। तर वं पत्याः मयाः। जितः सुनानं थथे धाः मवः, छि हे छम्ह जक वल गुम्हेसिनं जिगु चाहनायात निःशर्त पूरा याना बी धाल। थ्व खइ हे मखु धाल। जिं धाथें याना बी धयां अथे खःसा पाः फ धकाः पाः फयेकल, रत्नपार्कया ओभरहेड ब्रिजया पिलर नापं थना। जिं सत्य सत्य, धरोधर्म, खाचा, हँय्चा, दुगुचा, फैचा जक मखु, किमि स्यानाः हत्या धकाः पाः फया। अले तिति वं जितः का वा सा धया व ब्वाँय् वन हुत्तुत्तुत्तु धकाः। व जक छु ब्वाँय् वन, अन जःखः स्वयाच्वंपिं धाःपिं मनूत दक्व वया लिउ लिउ ब्वाँय् वन ।
इमिगु अज्याःगु गतिविधिं यानाः हानं छकः ट्राफिक व्यवस्था हे अन लाः थन लाः मदयेक स्यन। छक्वलं तुं मनूत थथे ब्वाँय् वःगु खनाः लँय् वयाच्वंपिं मनूत भःभःन्हुयाः ग्यानाः लिचिला वन। जिं पाः फयेधुंगुलिं व मचा मामां लिउ लिउ ब्वाँय् मवँसे हे मगात। जि नं तुफानं ब्वाँय् वना। अन जःखः च्वंपिंसं जितः स्वयाः छु छु धाल जुइ, उकियात जिं चिउताः मतया। व मचा ला भद्रकाली न्ह्यःने थ्यनाःलि तक्क दित। सें सें वयेक जि नं अन थ्यन। सेंसें वःगुलिं जिं छुं हे धाये मलाःनि। व मचां सिंहदरवार क्यनाः धाल, ''व प्रधानमन्त्री फ्यतुइगु मेचय् जितः फ्यतुका बिउ ।''
