थ्व वालय् नेप्से कुहां वंसां कारोबार च्वय्
येँ (सन्ध्या टाइम्स)/स्टक एक्सचेन्जय् जुयाच्वंगु शेयर कारोबारं थ्व वाःया नेप्से परिसुचकय् नं गाक्कं कुहां वःगु दु। छवाः न्ह्यःया शेयर कारोबारं सामान्य कुहां वःगु नेप्से थ्व वालय् गाक्कं कुहां वंगु दु। थुगु छवाःया दुने जूगु शेयर कारोबारं नेप्से २७ दशमलव ७९ अंकं कुहां वःगु दु। थुगु वालय् ५६२ दशमलव ११ अंकं शुरु जूगु शेयर कारोबार वाःया लिपांगु न्हि ५३४ दशमलव ३२ अंकय् थ्यंकाः कारोबार बन्द जुल ।
स्टक एक्सचेन्जय् थ्व छवाःया दुने ग्वीछगू कम्पनी ४९१० कारोबारं नीन्हय्गू करोड ख्वीच्यागू लाख पीन्हय्द्वः तका दां बराबरया न्यागू लाख ख्वीनिद्वः कित्ता शेयर न्याये-मी जुल। वंगु वालय् चय्गुंगू कम्पनीया ४५२१ गू कारोबारं नीखुगू करोड चय्न्हय्गू लाख ग्वीन्याद्वः तका दां बराबरया न्हय्गू लाख न्हय्न्हय्द्वः व च्यासः कित्ता शेयर कारोबार जूगु खः। थ्व ल्याखं वंगु वालय् स्वयां थुगु वालय् दांया कारोबारय् ३ प्रतिशतं थहां वंगु दु ।
स्टक एक्सचेन्जय् ग्व वालय् जूगु कारोबारय् 'क' वर्गया कम्पनीया जक झिंप्यंगू करोड पीन्हय्गू लाख तका दां बराबरया कारोबार जुल। नेप्से जूगु थ्व कूल कारोबारया ५२ दशमलव घण् प्रतिशत खः ।
'क' वर्गय् लाःगु कम्पनीया कारोबार मापन याइगु सेन्सेटिभ वाःया न्हापांगु न्हि १४० दशमलव ६९ अंकं शुरु जूगु खःसा ९ दशमलव १६ अंकं कुहां वयाः थ्व वालय् १३१ दशमलव ५३ अंकय् थ्यंगु दु ।
थुगु वालय् कारोबार जूगु कम्पनी मध्ये स्वंगू करोड न्हय्च्यागू लाख तका दां व छगू लाख ख्वीप्यद्वः कित्ता शेयर कारोबार याःगु लिधंसाय् फेवा फाइनान्स व च्यास व झिंन्हय्क्वः कारोबार याःगु लिधंसाय् प्राइम कमर्सियल बैंकं दकलय् न्ह्यःने लाःगु दु ।
थ्व वालय् नेपाल स्टक एक्सचेन्जय् सगरमाथा मर्चेण्ट फाइनान्स, प्रिमियर फाइनान्स व एक्सेल डेभलपमेण्ट बैंकया हकप्रद शेयर सुचीकृत जूगु दु ।
