'संयन्त्र गठन यायेमबीत कांग्रेस नेतात हे सक्रिय'
उपप्रधानमन्त्री सुजाता कोइरालां उच्चस्तरीय राजनीतिक संयन्त्र गठन यायेगु ज्या विरुद्ध नेपाली कांग्रेसया हे उच्च नेतात सक्रिय जूगु द्वपं बियादीगु दु ।
आइतवाः येँया रिपोटर्स क्लबय् जूगु साक्षातकार ज्याझ्वलय् न्ववानादिसें उपप्रधानमन्त्री कोइरालां नेपाली कांग्रेसया सभापति गिरिजाप्रसाद कोइरालाया पहलय् गठन जुइत्यंगु थंज्याःगु संयन्त्र विरुद्ध कांग्रेसया हे नेतात सक्रिय जुयाच्वंगु धासें असन्तुष्टि प्वंकादिल । वयेकलं संयन्त्र गठनया बारे थीथी दलया नेतात दथुइ सहलह जुयाच्वंगुलिं संयन्त्र याकनं गठन जुयातुं त्वतीगु विश्वास प्वंकादिल ।
वयेकलं सिंगापुरय् कांग्रेस सभापति कोइराला व माओवादी अध्यक्ष पुष्पकमल दाहाल 'प्रचण्ड' दथुइ नं संयन्त्र गठनया बारे हे खँल्हाबंला जूगु धयादिल । वयेकलं सिंगापुरय् सरकार परिवर्तनया बारे छुं नं कथंया सहलह व सहमति मजूगु नं स्पष्ट यानादिल ।
वयेकलं वर्तमान राजनीतिक संकटया मध्यमार्गी लँपू पाखे मालेमाःगु धयादिसें सहमतिया विकल्प मदुगु धयादिल । वयेकलं माओवादीयात वर्तमान सरकारय् दुथ्याकाः राष्ट्रिय सहमतिया सरकार दयेकेमाःगु बिचाः नं प्वंकादिल ।
