सरकार परिवर्तनया सम्भावना मदु : गच्छदार
उपप्रधानमन्त्री विजयकुमार गच्छदारं वर्तमान सरकार हल्लाया भरय् परिर्वतन मजुइगु खँ धयादीगु दु ।
आइतवाः सुथय् महेन्द्रनगरय् मधेशी जनअधिकार फोरम (लोकतान्कि) काचनपुरं ग्वसाःग्वःगु पत्रकार नापलायेगु ज्याझ्वलय् वयेकलं माओवादी प्रति लक्षित यासें तःधंगु दलं सरकार परिवर्तनया हल्ला यानाः अस्थिरता श्रृजना याःगु द्वपं बियादिल ।
वयेकलं कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' दथुइ सिंगापुरय् खँल्हाबंला जुइवं वर्तमान सरकर क्वःदलीगु सम्भावना मदुगु दाबी यानादिल । वयेकलं वर्तमान सरकारया पक्षय् कांग्रेस लगायत बहुमत दलतय् मत दुगुलिं छुं नं हालतं सरकार परिवर्तन मजुइगु दाबी यानादिल ।
फोरम लोकतान्त्रिकया अध्यक्ष नापं जुयादिम्ह उपप्रधानमन्त्री गच्छदारं उच्चस्तरीय राजनीतिक संयन्त्र राजनीतिक समझदारी व सहमति कायम यानाः दलतय् दथुइया द्वन्द्व ज्यंकेगु निंतिं गठन जुइत्यंगु धयादिल ।
