संयन्त्र लिपाः गतिरोध ज्यानी : उपप्रम कोइराला
उपप्रधानमन्त्री सुजाता कोइरालां नेपाली कांग्रेस सभापति गिरिजाप्रसाद कोइरालाया नेतृत्वय् उच्चस्तरीय राजनीतिक संयन्त्र निर्माण जुइधुंकाः राजनीतिक गतिरोध ज्यानीगु दाबी यानादीगु दु ।
शनिवाः कोहलपुरय् पत्रकारत नाप खँल्हाबंला यानादिसें वयेकलं कोइरालाया नेतृत्वय् उच्चस्तरीय राजनीतिक संयन्त्र निर्माण गठन जुसाः यक्वः राजनीतिक विवाद ज्यनीगु धयादिल । वयेकलं सिंगापुरय् कांग्रेस सभापति कोइराला व माओवादी अध्यक्ष पुष्पकमल दाहाल 'प्रचण्ड' दथुइ सत्ता समिकरणया बारे छुं नं सहमति मजूगु स्पष्ट यानादिल ।
परराष्ट्रमन्त्री नापं जुयादिम्ह कोइरालां माओवादी नेतृत्वया राष्ट्रिय सहमतिया सरकारया सम्भावना मदुगु धयादिसें थ्वहे सरकारय् माओवादी वयेमाः धयादिल । वयेकलं वर्तमान सरकारय् माओवादी नं वसाः थ्वहे राष्ट्रिय सहमतिया सरकार जुइगु धयादिल ।
माओवादीं स्वक्वःगु चरणया आन्दोलन कथं स्वायत्त गणराज्य घोषणा याइगु ज्याझ्वः शान्ति सम्झौता विपरित जूगु धयादिसें वयेकलं थुकीं राजनीतिक सहमति निर्माण यायेगु ज्याय् नं अवरोध थनीगु टिप्पणी यानादिल ।
वयेकलं शनिवाः कोहलपुरय् च्वंगु नेपालगंज मेडिकल कलेज कोहलपुर शिक्षण अस्पतालया निरीक्षण यानादीगु खः ।
