जिं राजीनमा बीमखु : खनाल
नेकपा (एमाले)या अध्यक्ष झलनाथ खनालं छुं नेतातय्सं थःगु राजीनामा फ्वनेवं थःम्हं राजीनामा मबीगु खँ धयादीगु दु ।
येँय् शनिवाः जूगु छगू ज्याझ्वलय् न्ववायेगु झ्वलय् वयेलकं थः एमालेया महाधिवेशनं बहमुत कयाः अध्यक्ष जूगु धयादिसें राजीनमा मबीगु स्पष्ट यानादिल । शुक्रवाः जूगु पार्टी पोलिटब्यूरोया बैठकय् अध्यक्ष खनालं दक्वः पक्षयात कःघानाः यंकेमफुगु धासें छुं नेतातय्सं वयेकया राजीनामा फ्वंगु खः ।
अथेहे ज्याझ्वलय् वयेकलं सिंगापुरय् कांग्रेस सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' दथुइ छुं नं कथंया सहमति मजूगु धयादिल । निम्ह नेतात दथुइ सत्ता हिलेगु बारे सहमति जुल धकाः बुखँ पिहांवयाच्वंगु ईलय् एमाले अध्यक्ष खनालं अज्याःगु बुखँयात वाहियातया संज्ञा बियादसें उकीया ल्यूने मवनेत इनाप यानादिल ।
वयेकलं उच्चस्तरीय राजनीति संयन्त्र याकनं हे गठन जुइगु धयादिसें दलत दथुइ सहमति जुसाः न्ह्यागु नं खँ अपुगु तरिकां यायेफइगु धयादिल ।
