थीथी थासय् जूगु सतक दुर्घटनाय् न्हय्म्ह सित
देय्या थीथी थासय् जूगु सतक दुर्घटनाय् लानाः न्हय्म्ह सिगु दुसाः झिम्ह स्वयां अप्वः घाःपाः जूगु दु ।
बैतडीया श्रीकेदार गाविसय् शनिवाः सुथय् ट्रीपर दुर्घटनाय् निम्ह ज्यामीत सीगु दु । बा. १. क. ६४०४ नम्बरया उगु ट्रीपर दुर्घटनाय् धादिङ गोगनपानी २ या पूर्ण मगर व चितवन गीतानगरया सुजन महतो सीगु खँ प्रहरीं धाःगु दु ।
अथेहे शनिवाः सुथय् हे खोटाङ च्यानडाडा १ सेखुवायय् मालबाहक ट्रक दुर्घटना जुया: छम्ह सीगु दु । भोजपुर पाखें दिक्तेल पाखे वनाच्वंगु को. १. ख. २७४१ नम्बरया ट्रप फातापुया पृथ्वीनारायण सुन्दास सीगु खः । अथेहे सल्यानया सिद्धेश्वरीया डाँढाकटेरीलय् ट्याक्टर दुर्घटना जुयाः ट्याक्टर चालक रामबहादुर घर्ति सीगु दु ।
दाङ लालमटीया ६ मौरीघाट चोकय् शनिवाः सुथय् ट्रकया ठक्करं खुदँया पोमबहादुर थापा सीगु दु ।
शुक्रवाः बहानी बुटवलया बेलबासय् पश्चिमं पूर्व पाखे वयाच्वंगु ट्रकं ट्याक्टरयात ठक्कर नकुवलय् रौतहटया नन्दी पटेल व पाल्पाया कृष्ण प्रसाद शर्मा सीगु दुसाः मेपिं स्वम्ह गम्भीर घाःपाः जूगु दु । ट्राफिक प्रहरी ज्याकू बुटवलया कथं लु. १. ख. ५४५ नम्बरया ट्रकं लु. २. त. ४४० नम्बरया ट्याक्टरयात ठक्कर नकूगु खः ।
शुक्रवा: बहनी हे रुपन्देहीलय् लु. ५. प. ६६१७ नम्बरय मोटरसाइकल व बा. ७. च. ८५५ नम्बरया कार ठक्कर नयाः जूगु दुर्घटनाय् मोटरसाइकल सावर निम्ह गम्भीर घाःपाः जूगु दु ।
