'सेना समायोजन जुइधुंकाः तिनि शान्ति प्रकृया तार्किक निष्कर्षय् थ्यनी'
प्रधानमन्त्री माधवकुमार नेपालं माओवादी सेना समायोजन व पुर्नस्थापना मजुतल्ले शान्ति प्रकृया तार्किक निष्कर्षय् थ्यनेमफइगु खँ धयादीगु दु । वयेकलं माओवादी पार्टी नाप लडाकू दुगु ईलय् तक व नागरिकया पार्टी जुइमफइगु धयादिसें सेना समायोजन व पुर्नस्थापना यायेत माओवादीं हे लिबाकाच्वंगु द्वपं बियादिल ।
नेपाल निर्माण व्यवसायी महासंघंया झिंस्वक्वःगु साधारणसभा व राष्ट्रिय सम्मेलनया धनगढीइ शुक्रवाः उल्लेज्या यानादिसें वयेकलं माओवादी लडाकूया समायोजन याकनं यायेमाःगु खँय् बः बियादिल । वयेकलं खुलाःया दुने लडाकू समायोजन यायेगु धाःसां स्वदँ दयेधुंकाः नं समायोजन जुइमफुगु धासें दुःख प्वंकादिल । वयेकलं माओवादी सेनाया व्यक्तिगत चाहना, योग्यता व क्षमताया आधारय् समायोजन व पुर्नस्थापना यायेत सरकार प्रतिबद्ध जूगु धयादिल ।
अथेहे वयेकलं शुक्रवाः हे नेपालगंजय् जूगु पत्रकार सम्मेलनय् न्ववानादिसें माओवादीं गणराज्य घोषणा यायेगु ज्याझ्वपाखें मुठभेडया स्थिति उत्पन्न जुइफइगु धयादिसें थुकीयात लित कायेत माओवादीयात इनाप यानादिल ।
