सत्ता परिवर्तनबारे गोप्य सहमति जूगु मदु : महरा
एकीकृत नेकपा (माओवादी)या विदेश विभाग प्रमुख कृष्णबहादुर महरां नेपाली कांग्रेसया सभापति गिरिजाप्रसाद कोइराला व माओवादी अध्यक्ष पुष्पकमल दाहाल 'प्रचण्ड' दथुइ सिंगापुरय् छुं नं कथंया लिखित वा मौखिक राजनीतिक सहमति मजूगु खँ धयादीगु दु ।
शुक्रवाः पार्टी ज्याकू पेरिस डाँडाय् नेता महरां छगू पत्रकार सम्मेलन यानाः सिंगापुरय् सभापति कोइराला व माओवादी अध्यक्ष प्रचण्ड दथुइ गोप्य सहमति जूगु धकाः थीथी संचार माध्यमय् पिहांवःगु बुखँय् छुं सत्यता मदुगु दाबी यानादिल ।
वयेकलं कोइराला व प्रचण्ड दथुइ उच्चस्तरीय राजनीतिक संयन्त्र निर्माण यानाः याकनं गतिरोध यायेगु सहलह जक जूगु धयादिसें मुक्कं झिंन्यागू मिनेट जक जूगु खँल्हाबंलाय् छुं कथंया गोप्य खँल्हाबंला मजूगु धयादिल ।
शुक्रवाः संचार माध्यमय् कोइराला व प्रचण्ड दथुइ सिंगापुरय् जूगु खँल्हाबंलाय् सत्ता परिवर्तन यायेगु सहमति जूगु धकाः बुखँ पिहांवःगु खः । सहमतिलय् राष्ट्रपति डा. रामवरण यादव व प्रधानमन्त्री माधवकुमार नेपालयात राजनीतिक संकट खडा यानाः राजीनामा बीत बाध्य यायेगु बारे सहमति जूगु दाबी यासें बुखँ पिहांवःगु खः ।
