प्रम वइगु जुइवं चक्का जाम
येँ (सन्ध्या टाइम्स)/ प्रधानमन्त्री माधव नेपाल थौं धनगढी वइगु जुइवं अनया माओवादी कार्यकर्तातय्सं धनगढीया कैलालीया ६ नम्बर क्षेत्रय् चक्काजाम याःगु दु।
थनिंनिसें धनगढीइ जुइत्यंगु नेपाल निर्माण व्यवसायी महासंघया झिंस्वक्वःगु साधारण सभाया उलेज्या यायेत प्रम नेपाल उखे झाःगु खः ।
माओवादी कार्यकर्तातय्सं थीथी थासय् प्रदर्शन यायेगु लिसें सतक अवरुद्ध यानाच्वंगु दु ।
माओवादीं सतक पना बिउगुलिं पूर्वपश्चिम राजमार्ग नापं ठप्प जुयाच्वंगु दुसा आपालं यात्रुत विचल्लिइ लानाच्वंगु दु।
माओवादीं नागरिक सर्वोच्चताया माग यासें आन्दोलन यानाच्वंगु दुसा आन्दोलनया झ्वलय् उमिसं सरकारया पदाधिकारीतय्त बहिष्कार यायेगु ज्याझ्वः नं याना वयाच्वंगु दु ।
प्रधानमन्त्री धनगढी वइगु जुइवं अनया सुरक्षा स्थिति कडा याःगु खः। प्रम माधव नेपाल अन थ्यनेवं माओवादी कार्यकर्तां वय्कःयात हाकुगु ध्वाँय् क्यंगु खःसा उकी प्रहरीं हस्तक्षेप याःगु खः। थुकिं यानाः छुं ई निगू पक्ष दथुइ ल्वापु नं जूगु खः ।
