माओवादीयात राष्ट्रपतिया टिप्स !
येँ (सन्ध्या टाइम्स)/राष्ट्रपति डा. रामवरण यादवयात म्हिगः आकाझाकां नाप लाना वयेधुंकाः आः वय्कलं हे धाः कथंया सहमति दयेकेगु ज्याय् माओवादी अध्यक्ष प्रचण्ड खटे जुइगु खँ धाःगु दु ।
राष्ट्रपति यादवं वय्कःपिंत म्हिगः फुक्कं दलत मिले जुयाः छगू सहमति दयेकुसें थःत इनाप यात धाःसा छु धाल व यायेत थः तयार दु धयादीगु खः। थुकियात अर्थ छ्यासें म्हिगःया वार्ताय् सहभागी जुयादीम्ह माओवादी उपाध्यक्ष नारायणकाजी श्रेष्ठं धयादिल, 'वय्कलं थथे धायेधुंकाः छु धाःगु धइगु ला थु हे थुल नि। आः जिपिं थ्वहे प्वाइन्टय् च्वनाः मेमेगु दलतलिसे वार्ता यायेगुली लगे जुयात्यनागु दु।'
राष्ट्रपतिया पलाः बारे पिहां वःगु विवाद ज्यंकेत आः गज्याःगु पलाः ल्ह्वनेगु जुइ धइगु न्ह्यसःया लिसलय् भाजु श्रेष्ठं धयादिल, 'उकिया थीथी विकल्पत वयाच्वंगु दु। सदनय् जिमिगु संकल्प प्रस्ताव प्रस्तुत याकेगु, मंकाः संकल्प प्रस्ताव हयेगु वा राष्ट्रपतिपाखें हे जिं द्वंकेधुन, आः मिले जुयाः वने नु धइ कथंया अभिव्यक्ति बीगु।' माओवादीया थौं च्वंगु बैठकय् नं थुकिया चर्चा जूगु खः ।
