नेवाः गणराज्य घोषणा

पुस १ गते व ११ गते निक्वः

येँ (सन्ध्या टाइम्स)/ एनेकपा (माओवादीं) स्थगित यानातःगु थीथी जातीय स्वायत्त गणराज्य घोषणा ज्याझ्वः हानं न्ह्याकीगु जूगु दु। थ्व झ्वलय् उमिसं थ्वहे वइगु पुस १ गते येँय् नेवाः स्वायत्त गणराज्य घोषणा याइगु जूगु दु।
तर माओवादीं पुस १ गते स्वायत्त नेवाः गणराज्य घोषणा याःसां पुस ११ गते नेवाःत थःपिंसं हे नेवाः स्वायत्त गणराज्य घोषणा यायेगु धकाः क्वःछिनातःगु ज्याझ्वः नं मदीगु खँ नेवाः स्वायत्त राज्य मंकाः संघर्ष समितिया दुजः मल्ल के.सुन्दरं 'सन्ध्या टाइम्स' यात कनादिल।
नेवाः गणराज्य घोषणा यायेगु मुख्य ज्या नेवाःतय्गु खः धासें माओवादीया घोषणां झीत बल प्राप्त जुइगु खँ नं वय्कलं कनादिल। वय्कलं धयादिल, 'थज्याःगु हे घोषणा मेमेगु पार्टीतय्सं नं याना बिल धाःसा झीगु आज्जु याकनं पूवनी।'
नेवाःतय्गु हे इनाप कथं माओवादीं ताम्सालिङ गणराज्य घोषणाया ज्या नेवाःतय्सं नं दावी यानाच्वंगु भ्वँतय् मयासे रोशी खुसि पारी च्वंगु तिमाल लागाय् यायेत्यंगु जानकारी नं बियादिल। तिमाल तामाङतय्गु थःगु हे इतिहास दुगु आदिभूमि खः ।