'राजनीतक कार्यकर्तायात राज्यं भत्ता बीफइमखु'
अर्थमन्त्री सुरेन्द्र पाण्डें एनेकपा (माओवादीं) डर व धम्की क्यनाः मेगू संसदीय चुनाव त्याकेत सेना समायोजन विशेष समितिया मातहतय् लडाकूत ह्ये चाहे मजूगु द्वपं बियादीगु दु ।
नेकपा (एमाले) काभ्रे क्षेत्र नं - २या क्षेत्रीय अधिवेशनया शुक्रवाः उल्लेज्या यानादिसें मन्त्री पाण्डें सेना समायोजन विशेष समितिया मातहतय् मदुगु लडाकूत राजनीतिक कार्यकर्ता जुइगु जूगुलिं राजनीतिक कार्यकर्तातय्त राज्यं भत्ता बीमफइगु धयादिल । वयेकलं अन्तरिम संविधान जारी जूगु खुलाःया दुने सेना संमायोजन विशेष समितिया मातहत लडाकूतय्त हयाः समायोजन यायेगु खँ न्ह्यथंना तःसां माओवादीं उखे पाखे गम्भीर मजूगु द्वपं बियादिल ।
वयेकलं संविधान निर्माण प्रकृयाय् देय् न्ह्याः वनाच्वंगुलिं शान्ति प्रकृयायात तार्किक निष्कर्षय् थ्यंकाः संविधान निर्माण यायेगु महत्वपूर्ण जिम्मेवारी राजनीतिक दलतय् ब्वलय् दुगु धयादिल । वयेकलं थ्व ईया दुने लडाकू समायोजन यायेमफुसाः संविधान निर्माण प्रकृया लिपाः लाइगु धयादिल ।
