देय्न्यंक पेट्रोलियम पदार्थया अभाव

एकीकृत नेकपा (माओवादी) सम्बद्ध अखिल नेपाल पेट्रोलियम मजदूर संघं शुक्रवाः नेपाल आयल निगम बन्द याकूगु दु । मजदूरतय् विरोधया कारणं निगमया डिपोपाखें पेट्रोल पम्पय् पेट्रोलियम पदार्थ यंकेफुगु मदु । पम्पं पेट्रोलियम पदार्थ यंकेमफेवं येँ नापं देय्या प्रमुख शहरया पेट्रोलया अभाव खनेदुगु दु ।

निजी पेट्रोल पम्पं मजदूरया माग पूमवंकूगु धासें संघं बन्दया घोषणा याःगु खः । संघं निजी पेट्रोल पम्पय् कार्यरत मजदूरयात नियुक्तिपत्र बीमाःगु, सरकारं क्वःछिउगु न्यूनतम तलब दयेमाःगु, स्थायी यायेमाःगु, बीमा यायेमाःगु, ओभर टाइम याइपिंत वहेकथं तलब अप्व बीमाःगु लगायत झिंखुगु सूत्रीय माग तःगु खः ।

‍आन्दोलनकारी मजदूरतय्सं आयल निगम पाखें पेट्रोल पम्पय् पेट्रोल यंकेमब्यूसां सरकारी पम्प (सेना, जनपथ, सशस्त्र प्रहरी व साझा) यात धाःसाः राष्ट्रिय प्रयोजनया निंतिं छन्हूया छगू ट्याङ्कर यंकेबीगु खँ धाःगु दु ।