प्रधानमन्त्रीया ज्याझ्वलय् माओवादी अवरोध, स्वम्ह घा:पा:
प्रधानमन्त्री माधवकुमार नेपालं ब्वति काइगु ज्याझ्वलय् अवरोध यायेत स्व:पिं एनेकपा (माओवादी)या कार्यकर्ता व प्रहरी दथुइ ल्वापू जूगु दु । धनगढी जूगु ज्याझ्वलय् ब्वति कायेत अन थ्यंकादिम्ह प्रधानमन्त्रीयात विरोध यायेगु झ्वलय् जूगु ल्वापूइ छम्ह प्रहरी नापं स्वम्ह घाःपाः जूगु दु ।
नेपाल निर्माण व्यवसायी महासंघया महाधिवेशनया उल्लेज्या यायेत प्रधानमन्त्री धनगढी वइगु जुइवं माओवादी कार्यकर्तातय्सं शुक्रवाः सुथं निसें नारा जुलुस व थाय् थासय् टायर ज्याकाः सतक अवरोध याःगु खः ।
अञ्चल प्रहरी ज्याकू पाखें ज्याझ्वः स्थल ओम पार्टी प्यालेसया निसः मिटर लँया अवरोध चीकेत स्वयेवं माओवादी कार्यकर्ता व प्रहरी दथुइ ल्वापू जूगु खः । प्रहरीं प्रदर्शनकारीतय् नियन्त्रणय् कायेत प्रहरीं अश्रुग्याँस व लाठी चार्ज याःगु खःसा प्रदर्शनकारीतय्सं अप्पां क्येकूगु खः ।
