विमान न्यायेगु प्रकृया दिकेत लेखा समितिया निर्देशन
सार्वजनिक लेखा समितिं न्हूगु विमान न्यायेगु प्रकृया दिकेत नेपाल वायु सेवा निगमयात निर्देशन ब्यूगु दु ।
शुक्रवाः सुथय् निगमया पदाधिकारीत नाप च्वंगु समितिया बैठकं थुगु प्रकृया दिकेत निर्देशन ब्यूगु खः । समितिं निगम संचालक समिति, अर्थमन्त्रालय व त्यासाः उपलब्ध याकेगु सञ्चय कोषनाप सहलह यानाः थप निर्णय यायेगु खँ धाःगु दु । समितिया सभापति रामकृष्ण यादवं विमान न्यायेगु प्रकृयाय् समितिया नं नां जोरे जूगुलिं आपत्ति प्वंकादिसें समितियात जोरे यानाः वक्तव्यवाजी मयायेत इनाप यानादिल ।
अनियमितताया आशंकाय् वंगु वाःलय् च्वंगु समितिया बैठकं विमान न्यायेगु प्रकृयाया भ्वँ उपलब्ध यायेत याःगु इनाप यात बेवास्ता यायेवं समितिं शुक्रवाः हानं निगमया पदाधिकारीयात सःतुगु खः । बैठकय् पर्यटन मन्त्रालयया सचिव नगेन्द्र घिमिरे, निगमया कार्यकारी अध्यक्ष सुगतरत्न कंसाकार, महाप्रवन्धक केवी लिम्बू उपस्थित जूगु खः ।
निगमं युरोपेली कम्पनी एयर बस नाप निगः विमान न्यायेगु निर्णय यानाः प्रकृया न्ह्याकूगु खः ।
